शाळा विश्वस्ताच्या मुलाची शिक्षिकेकडे शरीरसुखाची मागणी, नागरीकांमध्ये संतापाची लाट

एज्युवार्ता न्यूज नेटवर्क

डोंबिवली परिसरातील एका नामांकित शाळेत (Incident at a Renowned School) अत्यंत संतापजनक प्रकार उघडकीस आला आहे. विद्येचे मंदिर मानली जाणारी शाळा आणि गुरु समान असलेले शिक्षक ही संकल्पना लयाला जाते की काय? असा गंभीर प्रश्न निर्माण झालाय. त्याला कारण ठरलंय शाळा ट्रस्टीच्या मुलाने (The School Trustee's Son) आपल्याच शाळेत शिकवणाऱ्या शिक्षिकेकडे केलेली शरीरसुखाची (Demand for physical intimacy) मागणी. या प्रकारामुळे परिसरात संतापाची लाट उसळली आहे. तर शाळा ट्रस्टीने या प्रकरणी कडक भूमिका घेतल्याचे दिसून आले आहे. 

मिळालेल्या माहितीनुसार, सागाव येथील जय भारत हायस्कूलमध्ये हा प्रकार घडल्याचे समोर आले आहे. या शाळेचे ट्रस्टी शिवा अय्यर यांचा मुलगा सरवना अय्यर याने शाळेतील एका शिक्षिकेला अश्लील मेसेज पाठवून त्रास देण्यास सुरुवात केली. आरोपीने केवळ मेसेजच नाही, तर अश्लील व्हिडिओ पाठवून शिक्षिकेकडे शरीरसंबंधांची मागणी केल्याचा आरोप पीडित शिक्षिकेने तक्रारीत केला आहे. हा छळ असह्य झाल्याने शिक्षिकेने तिच्या आईसह स्थानिक मनसे पदाधिकाऱ्यांकडे धाव घेत न्यायाची मागणी केली.

दरम्यान, घटनेची गंभीरता लक्षात घेत मनसे कार्यकर्त्यांनी थेट शाळा गाठली. यावेळी शाळेत ट्रस्टी शिवा अय्यर आणि त्यांच्या पत्नी उपस्थित होत्या. शाळेत सुमारे 1 तास तणावाचे वातावरण होते. काही वेळात घटनास्थळी स्थानिक पोलिस घटनास्थली दाखल झाले. पोलिसांनी परिस्थितीवर नियंत्रण मिळवत मनसे पदाधिकाऱ्यांना शांत केले. तसेच आरोपी सरवना अय्यर याला त्याच्या राहत्या घरातून उचलून पोलीस ठाण्यात नेले.

मुलावर झालेल्या गंभीर आरोपांनंतर शाळेचे ट्रस्टी शिवा अय्यर यांनी कडक भूमिका घेतल्याचे पाहायला मिळाले. त्यांनी सांगितले की, माझ्या मुलावर जो काही गंभीर आरोप करण्यात आला आहे, त्या प्रकरणात तो जर दोषी आढळला तर त्याला कायद्यानुसार कडक शिक्षा झालीच पाहिजे. सध्या मानपाडा पोलीस या प्रकरणाचा सविस्तर तपास करत असून, पीडित शिक्षिकेचा जबाब नोंदवण्याची प्रक्रिया सुरू आहे.