शिक्षक भरतीची निवड यादी जाहीर, १ हजार ११४ उमेदवारांची शिफारस

एज्युवार्ता न्यूज नेटवर्क 

शिक्षक भरतीच्या (Teacher Recruitment) संदर्भातील महत्त्वाची अपडेट समोर आली आहे. पवित्र पोर्टलमार्फत (Pavitra Portal) राबविण्यात येत असलेल्या शिक्षक भरती प्रक्रियेतील मुलाखतीविना निवडीअंतर्गत (Selections without interviews) शिफारस करण्यात आलेल्या उमेदवारांची यादी जाहीर (List of candidates announced) करण्यात आली आहे. त्यानुसार राज्यातील तब्बल १ हजार ११४ उमेदवारांची शिफारस करण्यात आली असून, त्यात मराठी माध्यमासाठी ९६३, उर्दू माध्यमासाठी १००, हिंदी माध्यमासाठी ३५, बंगाली माध्यमासाठीच्या १६ उमेदवारांचा समावेश आहे. त्यामुळ मागील काही महिन्यापासून प्रतीक्षेत असलेल्या उमेदवारांना आता काहीसा दिलासा मिळाला आहे. 

शिक्षण विभागाने प्रसिद्धिपत्रकाद्वारे दिलेल्या माहितीनुसार, पवित्र पोर्टलद्वारे दुसर्‍या टप्प्यातील शिक्षक भरती प्रक्रिया राबवण्यात येत आहे. दुसऱ्या टप्प्यातील मुलाखतीविना निवडीचा पर्याय निवडलेल्या १८ जिल्हा परिषदांनी ४६८, १३ महापालिकांनी ३६२, ५७ नगरपालिका- नगर परिषदांनी २२१, तर २५ खासगी शैक्षणिक संस्थांनी ५३७ अशा एकूण १ हजार ५८८ रिक्त पदांच्या भरतीची मागणी केली होती. त्यानुसार पात्रताधारक उमेदवारांचे निवड यादीकडे लक्ष लागले होते. 

त्यानुसार मुलाखतीविना निवडीअंतर्गत १ हजार ५८८ रिक्त पदांसाठी एकूण १ हजार ११४ उमेदवारांची शिफारस करण्यात आली आहे. त्यात पहिली ते चौथीसाठी ५५४, सहावी ते आठवीसाठी २१०, नववी ते दहावीसाठी २१६, अकरावी ते बारावीसाठी १३४ शिक्षकांची निवड करण्यात आली आहे. ज्यामध्ये अनुसूचित जातीतील ३५, अनुसूचित जमातीतील ६४, विमुक्त जातीतील (अ) ३७, भटक्या जमातीतील (ब) २६, भटक्या जमातातील (क) २२, भटक्या जमातीतील (ड) १४, विशेष मागास प्रवर्गातील ६, इतर मागास प्रवर्गातील १६८, आर्थिकदृष्ट्या दुर्बल घटकातील १०७, सामाजिक व शैक्षणिक मागास प्रवर्गातील १३३, खुल्या प्रवर्गातील ४०२ उमेदवारांचा समावेश आहे.