सावित्रीबाई फुले पुणे विद्यापीठाचा देशात डंका;आंतरराष्ट्रीय अन्वेषण स्पर्धेत सुवर्ण पदक 

एज्युवार्ता न्यूज नेटवर्क 

सावित्रीबाई फुले पुणे विद्यापीठाने (SPPU) प्रतिष्ठित अन्वेषण २०२५ या आंतरराष्ट्रीय विद्यार्थी संशोधन अधिवेशनात उल्लेखनीय यश संपादन करून शैक्षणिक क्षेत्रात अभिमानास्पद कामगिरी केली आहे. विविध गटांमध्ये पारितोषिके पटकावून विद्यापीठाने आंतरविद्याशाखीय संशोधन व नवोपक्रमाबाबतची आपली बांधिलकी अधोरेखित केली आहे.विद्यापीठाला सुवर्ण पदक मिळाले असून केवळ महाराष्ट्रात नाही तर देशात डंका वाजला आहे.

या स्पर्धेत पुढील सहा प्रमुख विभागांमध्ये नवोन्मेषी संशोधन प्रकल्प तसेच पूर्वी संशोधित संकल्पनांचे प्रत्यक्ष अंमलबजावणीसह सादरीकरण केले जाते. त्यात मूलभूत विज्ञान, अभियांत्रिकी व तंत्रज्ञान, आरोग्य विज्ञान व संलग्न विषय, कृषी विज्ञान व संलग्न क्षेत्रे, समाजशास्त्र, मानवविद्या, वाणिज्य व व्यवस्थापन, कायदा, आंतरविद्याशाखीय संशोधन यांचा समावेश आहे.

विद्यापीठाने आरोग्य विज्ञान विभागात विद्यापीठाने प्रथम पारितोषिक व सुवर्णपदक मिळवले आहे.आरोग्य विज्ञान व संलग्न विषय या विभागात कु. सिद्धी जोशी व कु. तनिषा कसबे यांनी सादर केलेल्या "PROHEAL - An Innovative, Multifunctional Probiotic Based Dressing System for Diabetic Wounds" या अभिनव संशोधन प्रकल्पाला प्रथम पारितोषिक मिळाले. त्यांना ७५,०००/- रोख पारितोषिक, प्रमाणपत्र तसेच प्रतिष्ठेचे डॉ. सर्वपल्ली राधाकृष्णन सुवर्णपदक प्रदान करण्यात आले.

हा प्रकल्प मधुमेही जखमांच्या प्रभावी उपचारासाठी प्रोबायोटिक-आधारित बहुउद्देशीय ड्रेसिंग प्रणाली विकसित करण्यावर आधारित असून त्यामध्ये आरोग्य क्षेत्रातील उपयोज्यता दिसून येते. हा प्रकल्प प्रा. राहुल पडाळकर (AISSMS College of Pharmacy) यांच्या सक्षम मार्गदर्शनाखाली पूर्ण करण्यात आला असून त्यांच्या मार्गदर्शनाचा या यशात महत्त्वाचा वाटा आहे.

कृषी विज्ञान विभागात तृतीय पारितोषिक

कृषी विज्ञान व संलग्न क्षेत्रे या विभागात श्री. शिवम देवकर यांनी सादर केलेल्या "High-Performance Multipurpose Mulching Paper Laying Machine" या प्रकल्पाला तृतीय पारितोषिक प्राप्त झाले. त्यांना २५,०००/- रोख पारितोषिक, प्रमाणपत्र व स्मृतिचिन्ह प्रदान करण्यात आले. हा प्रकल्प शेतीतील मल्चिंग प्रक्रियेची कार्यक्षमता वाढविण्यासाठी विकसित करण्यात आलेली यांत्रिक प्रणाली असून श्रमबचत, कार्यगती आणि उत्पादकता वाढविण्यावर भर देतो.

कुलगुरू डॉ. सुरेश गोसावी म्हणाले, "ही उल्लेखनीय कामगिरी सावित्रीबाई फुले पुणे विद्यापीठाच्या शैक्षणिक सामर्थ्य, संशोधन संस्कृती आणि जागतिक दृष्टीकोनाचे प्रतीक आहे. समाजाभिमुख नवोपक्रमाद्वारे आंतरराष्ट्रीय स्तरावर परिणामकारक उपाय निर्माण करण्याची विद्यार्थ्यांची क्षमता यातून स्पष्ट होते. तसेच, संशोधन संस्कृती जोपासण्यासाठी आणि विद्यार्थ्यांना प्रोत्साहन देण्यासाठी सातत्याने परिश्रम घेणाऱ्या IQAC टीमचेही मी मनःपूर्वक अभिनंदन करतो. त्यांच्या समन्वयित प्रयत्नांमुळे हे यश शक्य झाले आहे."

----------------------------------

"विविध विभागात अव्वल पारितोषिके मिळवून सुवर्णपदक पटकावणे हे विद्यापीठात विकसित होत असलेल्या आंतरविद्याशाखीय परिसंस्थेचे द्योतक आहे. ही कामगिरी नव्या संशोधक पिढीला प्रेरणा देणारी आहे."

-  डॉ..पराग काळकर - प्र-कुलगुरू

-------------

"ही यशोगाथा आमच्या गुणवत्ता-केंद्रित संशोधन मार्गदर्शन प्रणालीची परिणामकारकता दर्शविते. विद्यार्थ्यांची मेहनत आणि प्राध्यापकांचे सक्षम मार्गदर्शन यामुळे आंतरराष्ट्रीय दर्जाचे संशोधन साकार झाले आहे. आम्हाला त्यांचा अभिमान आहे."

- डॉ. विनायक जोशी, संचालक आयक्यूएसी,