आउटलुक ICARE रँकिंगमध्ये सावित्रीबाई फुले पुणे विद्यापीठ देशात तिसरे; मुंबई विद्यापीठ 26 , शिवाजी विद्यापीठ 40 व्या क्रमांकावर
महाराष्ट्रातील सावित्रीबाई फुले पुणे विद्यापीठ 3 क्रमांकावर असून मुंबई विद्यापीठ 26 व्या क्रमांकावर तर डॉ.बाबासाहेब आंबेडकर मराठवाडा विद्यापीठ 28 व्या क्रमांकावर आहे.
eduvarta@gmail.com 
एज्युवार्ता न्यूज नेटवर्क
आउटलुक ICARE रँकिंग 2025 (Outlook ICARE ranking) जाहीर झाले असेल राज्य सार्वजनिक विद्यापीठ कॅटेगिरी मध्ये सावित्रीबाई फुले पुणे विद्यापीठाने (Savitribai Phule Pune University) देशात तिसरा क्रमांक पटकवला आहे. त्यात पश्चिम बंगाल येथील जाधवपूर विद्यापीठ (Jadavpur University)पहिल्या क्रमांकावर असून कोलकत्ता विद्यापीठ दुसऱ्या क्रमांकावर आहे. सावित्रीबाई फुले पुणे विद्यापीठाला 1 हजारापैकी 928.43 गुण मिळाले असून कोलकाता विद्यापीठाला 928.49 गुण मिळाले आहेत.तर पहिल्या क्रमांकावरील जाधवपूर विद्यापीठाने 929.7 गुण मिळवले आहेत.
अकॅडमी रिसर्च अँड एक्सलन्समध्ये सावित्रीबाई फुले पुणे विद्यापीठाला 400 पैकी 386.98 गुण, इंडस्ट्री इंटरफेस अँड प्लेसमेंटमध्ये 200 पैकी 192.2 गुण तर इन्फ्रास्ट्रक्चर अँड फॅसिलिटीमध्ये 150 पैकी 136.43 गुण मिळाले आहेत. आउटलुकतर्फे 1 ऑगस्ट 2025 रोजी देशभरातील 75 टॉप सार्वजनिक राज्य विद्यापीठांची यादी जाहीर करण्यात आली. त्यात महाराष्ट्रातील सावित्रीबाई फुले पुणे विद्यापीठ 3 क्रमांकावर असून मुंबई विद्यापीठ 26 व्या क्रमांकावर तर डॉ.बाबासाहेब आंबेडकर मराठवाडा विद्यापीठ 28 व्या क्रमांकावर आहे. कोल्हापूर येथील शिवाजी विद्यापीठ 40 व्या क्रमांकावर असून उत्तर महाराष्ट्र विद्यापीठ 46 व्या क्रमांकावर आहे. त्याचप्रमाणे राष्ट्रसंत तुकडोजी महाराज नागपूर विद्यापीठ 52 व्या क्रमांकावर असून गोंडवाना विद्यापीठ ७५व्या क्रमांकावर आहे.
---------------------------------------------------
"आउटलुक-ICARE रँकिंग २०२५ मध्ये तिसऱ्या क्रमांकाचे सर्वोत्कृष्ट राज्य सार्वजनिक विद्यापीठ म्हणून गौरव होणे, ही आमच्यासाठी अत्यंत अभिमानाची आणि सन्मानाची बाब आहे. हे यश आमच्या प्राध्यापक, होतकरू विद्यार्थी आणि समर्पित कर्मचाऱ्यांच्या एकत्रित कठोर परिश्रमाचे द्योतक आहे. आम्ही शिक्षण आणि संशोधनाचे दीपस्तंभ म्हणून सावित्रीबाई फुले पुणे विद्यापीठाचा वारसा पुढे नेत, यापुढेही यशाची नवी शिखरे गाठण्याचा प्रयत्न करत राहू."
-डॉ. सुरेश गोसावी, कुलगुरू, सावित्रीबाई फुले पुणे विद्यापीठ
-----------------------------------------------------------
" तिसऱ्या क्रमांकाचे रँकिंग हे उल्लेखनीय आहे. शैक्षणिक आणि संशोधनातील उत्कृष्टतेचा आमचा अथक प्रयत्न आहे. गुणवत्तापूर्ण शिक्षण देणाऱ्या आमच्या प्राध्यापकांच्या समर्पणाचे, संशोधकांच्या नाविन्यपूर्ण वृत्तीचे आणि एसपीपीयू परिवारातील प्रत्येक सदस्याच्या कठोर परिश्रमाचे हे स्पष्ट प्रतिबिंब आहे. शैक्षणिक कार्यक्रम सतत प्रगत करत, औद्योगिक भागीदारी मजबूत करत आणि विद्यार्थ्यांना जागतिक दर्जाचे शिक्षण वातावरण उपलब्ध करून देत या यशावर अधिक प्रगती साधण्यासाठी आम्ही कटिबद्ध आहोत."
-डॉ. पराग काळकर, प्र-कुलगुरू, सावित्रीबाई फुले पुणे विद्यापीठ
