अमरावती विद्यापीठाकडून विद्यार्थ्यांची लूट; दुप्पट शुल्कवाढ

एज्युवार्ता न्यूज नेटवर्क

संत गाडगेबाबा अमरावती विद्यापीठ (Sant Gadge Baba Amravati University) प्रशासनाने दिनांक १६ ऑगस्ट रोजी अधिसूचना काढून (Fee hike notification) शुल्क वाढ झाल्याचे घोषित केले. परंतु विद्यापीठांने मागील वर्षीच शुल्क वाढ केली असल्याने सदरची शुल्क वाढ ही महाराष्ट्र सार्वजनिक विद्यापीठ कायदा २०१६ (Public Universities Act 2016), विद्यापीठ अध्यादेश व विद्यापीठ अनुदान आयोगाचे नियमन यांच्या तरतुदींचे उल्लंघन करून केलेली असल्याने बेकायदेशीर आहे, असल्याचा आरोप विद्यार्थी सेना जिल्ह्याप्रमुख (उद्धव बाळासाहेब ठाकरे) योगेश सोळंके (Yogesh Solanke) यांनी केला आहे. येत्या आठ दिवसांमध्ये संबंधित शुल्क वाढीचा निर्णय परत न घेतल्यास युवासेना कुलगुरू यांच्या दालनासमोर तीव्र भिक मांगो आंदोलन करेल, असा इशारा देण्यात आला आहे.

देशातील एक तृतियांश विद्यार्थी घेतात खाजगी शिकवणी; सर्वेक्षणातून उघड

विद्यार्थ्यांची लूट ही महाविद्यालयांनी केली तर ती थोडी अपेक्षित वाटते, पण आज सरळ संत गाडगेबाबा अमरावती विद्यापीठानेच तो ठेका आपल्या हाती घेतला आहे. विद्यापीठाने २०२४ मध्येच शुल्कवाढ करून विद्यार्थ्यांचे खिसे झाडले होते तरी पुन्हा २०२५ मध्ये का? विद्यापीठाचा स्वतःचा अध्यादेश क्र. ३/२०२१ कलम ८ सांगतो, “शिक्षण शुल्क वगळता इतर शुल्क दोन वर्षांनीच वाढवता येतील, तेही १०% ने ” पण इथे दोन वर्ष काय, दोन महिने थांबायचीही घाई नाही. सरळ सलग दुसऱ्या वर्षी डाका. म्हणजे विद्यापीठ प्रशासनाने स्वतःच्या नियमालाच गोणीत घालून गटारात फेकले, असल्याचे योगेश सोळंके यांनी म्हटले आहे.

संत गाडगे बाबा विद्यापीठाने सलग दुसऱ्या वर्षी शुल्क वाढीचा निर्णय घेतल्याने युवासेना (उद्धव बाळासाहेब ठाकरे) यांची विद्यार्थी सेना मात्र या निर्णयाविरोधात कुलगुरू समोर उभी ठाकली आहे. कुलगुरूंना निवेदन देण्यात येत आहेत. येत्या आठ दिवसांमध्ये शुल्कवाढ मागे घ्या, नाहीतर आमचं ‘भिक मांगो आंदोलन’ तुमच्या खुर्चीला वाळवी लावेल' असा साफ इशारा जिल्हाप्रमुख योगेश सोळंके यांनी दिला आहे.