SPPU विद्यापीठातील रीफेक्टरी शुल्कवाढ मागे घ्या; कुलसचिवांकडे मागणी
सध्या राज्यातील अनेक भागांमध्ये दुष्काळजन्य परिस्थिती निर्माण झालेली असून, वाढती महागाई व आर्थिक अडचणींचा विद्यार्थ्यांवरही मोठ्या प्रमाणात परिणाम होत आहे.अशा परिस्थितीत विद्यापीठ प्रशासनाने रिफेक्टरीच्या शुल्कात वाढ करण्याचे परिपत्रक काढल्याने विद्यार्थ्यांमध्ये चिंता व अस्वस्थतेचे वातावरण निर्माण झाले आहे
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठ हे महाराष्ट्रासह देशभरातील विद्यार्थ्यांसाठी एक प्रतिष्ठित शैक्षणिक केंद्र असून, विद्यापीठात महाराष्ट्राच्या विविध भागांतून विद्यार्थी शिक्षण घेण्यासाठी येतात. सध्या राज्यातील अनेक भागांमध्ये दुष्काळजन्य परिस्थिती निर्माण झालेली असून, वाढती महागाई व आर्थिक अडचणींचा विद्यार्थ्यांवरही मोठ्या प्रमाणात परिणाम होत आहे.अशा परिस्थितीत विद्यापीठ प्रशासनाने रिफेक्टरीच्या शुल्कात वाढ करण्याचे परिपत्रक काढल्याने विद्यार्थ्यांमध्ये चिंता व अस्वस्थतेचे वातावरण निर्माण झाले आहे. विद्यार्थ्यांच्या आर्थिक परिस्थितीचा तसेच त्यांच्या मूलभूत गरजांचा विचार करून शुल्कवाढ मागे घ्यावी, अशी मागणी विद्यार्थी संघटनांकडून करण्यात आली आहे.
रिफेक्टरी भोजन शुल्कातील १० रुपयांची वाढ तात्काळ रद्द करण्यात यावी.विद्यार्थ्यांवर आधीच विविध शैक्षणिक व दैनंदिन खर्चाचा आर्थिक भार आहे. त्यामुळे भोजन शुल्कामध्ये करण्यात आलेली १० रुपयांची वाढ तात्काळ रद्द करून विद्यार्थ्यांना दिलासा देण्यात यावा. विद्यापीठातील इनडोर हॉल शेजारील व्यायामशाळेत अनेक उपकरणे तुटलेले आहेत त्याची दुरुस्ती तातडीने करण्यात यावी व नवीन साहित्य खरेदी करून सर्व विद्यार्थ्यांसाठी पूर्ववत करावी.
विद्यापीठातील सर्व महापुरुषांच्या पुतळ्यांना काळसर स्वरूपाचा रंग दिला आहे तो बदलून पूर्वीचा रंग देण्यात यावा.भोजनगृह समितीची बैठक तातडीने आयोजित करण्यात यावी.मागील चार महिन्यांपासून भोजनगृह समितीची बैठक झालेली नसल्याचे विद्यार्थ्यांच्या निदर्शनास आले आहे. त्यामुळे विद्यार्थ्यांचे प्रतिनिधी, संबंधित अधिकारी व भोजनगृह समिती यांच्या उपस्थितीत व्यापक बैठक तातडीने आयोजित करून भोजनाची गुणवत्ता, शुल्क, सुविधा व विद्यार्थ्यांच्या इतर अडचणींवर सविस्तर चर्चा करण्यात यावी.
या मागण्यांचा विद्यार्थी हिताच्या दृष्टीने सहानुभूतीपूर्वक व तातडीने विचार करून योग्य तो निर्णय घेण्यात यावा, असे निवेदन कुलसचिव डॉ प्रफुल्ल पवार यांना देण्यात आले आहे.तसेच प्रशासनाकडून सकारात्मक निर्णय न झाल्यास विद्यार्थ्यांना लोकशाही व सनदशीर मार्गाने आंदोलन करण्याची भूमिका घ्यावी लागू शकते, याची कृपया नोंद घ्यावी. असा इशारा देण्यात आला आहे. शिवा बारोळे,नवनाथ कावळे,अक्षय सूर्यवंशी,तनिष्क मोरे,गणेश शिंदे आणि इतर विद्यार्थी यांनी प्रफुल्ल पवार यांना निवेदन दिले.
दरम्यान, याबाबत प्रभारी कुलसचिव डॉ प्रफुल्ल पवार म्हणाले, विद्यार्थी संघटनांचे रिफेक्टरी दर वाढीसह इतर मागण्यांचे निवेदन प्राप्त झाले असून त्याबाबत सकारात्मक विचार करून आवश्यक उपाययोजना केल्या जातील.
------------------
विद्यार्थ्यांच्या प्रश्नांकडे विद्यापीठ प्रशासनाने गांभीर्याने पाहण्याची गरज आहे. संपूर्ण महाराष्ट्रभरात दुष्काळग्रस्त परिस्थिती असताना भोजन शुल्कातील १० रुपयांची वाढ विद्यार्थ्यांवर अतिरिक्त आर्थिक भार टाकणारी आहे त्यामुळे ही दरवाढ तात्काळ रद्द करावी,त्याचबरोबर व्यायामशाळेची झालेली दुरवस्था तातडीने दुरुस्त करावी, महापुरुषांच्या पुतळ्यांचा रंग पूर्वीप्रमाणे दिला जावा आणि भोजनगृह समितीच्या बैठकीचा अभाव हेही विद्यार्थ्यांच्या मूलभूत प्रश्नांशी संबंधित विषय आहेत.प्रशासनाने आमच्या रास्त मागण्यांवर तातडीने सकारात्मक निर्णय घ्यावा; अन्यथा विद्यार्थ्यांच्या हितासाठी लोकशाही मार्गाने मोठे आंदोलन उभा करू.”
— शिवा बारोळे, विद्यार्थी प्रतिनिधी
