ICAI चा मोठा निर्णय! सीए अभ्यासक्रमात आता एआय चा समावेश; संस्थेकडून अधिकृत माहिती
ICAI ने 'AURA' द्वारे CA विद्यार्थ्यांसाठी AI प्रशिक्षण सुरू केले आहे, तसेच भविष्यासाठी आवश्यक कौशल्ये विकसित करण्याच्या उद्देशाने आगामी CA अभ्यासक्रमात AI चा समावेश करण्याचे नियोजनही केले आहे.
Eduvarta
एज्युवार्ता न्यूज नेटवर्क
कृत्रिम बुद्धिमत्तेचा वेगाने वाढणारा वापर लक्षात घेऊन इन्स्टिट्यूट ऑफ चार्टर्ड अकाउंटंट्स ऑफ इंडियाने (आयसीएआय) सनदी लेखापाल अभ्यासक्रमाच्या शिक्षण आणि प्रशिक्षणात एआयचा समावेश करण्याचा महत्त्वाचा निर्णय घेतला आहे. सध्या शिक्षण घेत असलेल्या आणि विद्यमान अभ्यासक्रमात एआयचा समावेश नसलेल्या विद्यार्थ्यांसाठी ‘ऑरा’ हा स्वतंत्र प्रशिक्षण अभ्यासक्रम सुरू करण्यात आला आहे. त्याचबरोबर आगामी नव्या अभ्यासक्रमात एआयचा समावेश करण्याची प्रक्रियाही सुरू आहे. या माध्यमातून सीए शिक्षणात तंत्रज्ञानाधारित बदलांना स्थान देण्याची संस्थेची तयारी स्पष्ट झाली आहे, असे संस्थेचे अध्यक्ष सीए प्रसन्ना कुमार डी. यांनी सांगितले आहे.
एआयमुळे बदलत्या व्यावसायिक वातावरणात चार्टर्ड अकाउंटंट्सना आवश्यक कौशल्ये विकसित करण्याची संधी उपलब्ध करून देणे हे या निर्णयाचे मुख्य उद्दिष्ट आहे. विद्यमान विद्यार्थ्यांना स्वतंत्र प्रशिक्षण देणे आणि भविष्यातील अभ्यासक्रमात एआय थेट समाविष्ट करणे, या दोन मार्गांनी आयसीएआयने पावले उचलली आहेत. एआय हा आता केवळ पूरक विषय राहणार नसून तो अभ्यासक्रमाचा अविभाज्य भाग बनणार असल्याचे अध्यक्षांनी स्पष्ट केले. संस्थेने बाहेरील तज्ज्ञांवर अवलंबून न राहता तंत्रज्ञान क्षेत्रात आधीपासून कार्यरत असलेल्या सीएंच्या अनुभवाचा उपयोग करून अभ्यासक्रम विकसित केला आहे.
अनेक विद्यार्थी सध्या सीएचे शिक्षण घेत आहेत, पण त्यांच्या अभ्यासक्रमात एआय प्रशिक्षणाचा समावेश नाही. अशा विद्यार्थ्यांसाठी ‘ऑरा’ अभ्यासक्रम ऑनलाइन माध्यमातून सुरू करण्यात आला आहे. याद्वारे एआयच्या विविध पैलूंचे प्रशिक्षण दिले जाणार आहे. उपाध्यक्ष सीए मंगेश किनरे यांनी सांगितले की, विद्यार्थ्यांनी व्यावसायिक क्षेत्रात प्रवेश करण्यापूर्वी एआय वापराबाबत आवश्यक कौशल्ये मिळावीत, या उद्देशाने हा अभ्यासक्रम राबवला जात आहे. जुलै २०२४ पासून आतापर्यंत जवळपास ५५ हजार सीएंनी ‘ऑरा-१’ प्रशिक्षण पूर्ण केले आहे.
‘ऑरा-१’ पूर्ण केलेल्या विद्यार्थ्यांना अधिक प्रगत स्वरूपाचे प्रशिक्षण देण्यासाठी आता ‘ऑरा-२’ चा पुढील टप्पा सुरू होणार आहे. तीन वर्षांपूर्वी आयसीएआयने एआयशी संबंधित उपक्रम सुरू केला होता. त्यानंतर सीएंसाठी तीन दिवसांचा प्रत्यक्ष प्रशिक्षणावर आधारित एआय प्रमाणपत्र अभ्यासक्रम विकसित करण्यात आला. हा अभ्यासक्रम तंत्रज्ञान क्षेत्रात प्रत्यक्ष काम करणाऱ्या चार्टर्ड अकाउंटंट्सनी तयार केला आहे.
इतर संस्थांचा अभ्यासक्रम जसाच्या तसा स्वीकारण्याऐवजी आयसीएआयने स्वतःचा अभ्यासक्रम तयार केला. चार्टर्ड अकाउंटंट्सना व्यवसाय आणि उद्योग क्षेत्रात एआयचा उपयोग कसा करता येईल तसेच कोणती कामे एआयद्वारे सोडवता येतील, यावर भर देण्यात आला आहे. अशा प्रकारे आयसीएआय सीए शिक्षणाला आधुनिक तंत्रज्ञानाशी जोडत आहे.
