जेईई मेन अन् बारावी बोर्ड तोंडी परीक्षा एकाच वेळी; विद्यार्थ्यांमध्ये प्रचंड तणाव
महाराष्ट्र एचएससी प्रात्यक्षिक परीक्षा आणि जेईई मेन २०२७ यांच्या वेळापत्रकात एकाच वेळी येण्याची (ओव्हरलॅप होण्याची) शक्यता आहे, ज्यामुळे बोर्ड आणि अभियांत्रिकी प्रवेश परीक्षांची तयारी करणाऱ्या विद्यार्थ्यांमध्ये चिंतेचे वातावरण निर्माण झाले आहे.
Eduvarta
एज्युवार्ता न्यूज नेटवर्क
राज्य माध्यमिक व उच्च माध्यमिक शिक्षण मंडळाने यंदा बारावीच्या लेखी परीक्षा ८ फेब्रुवारीपासून तर दहावीच्या लेखी परीक्षा १५ फेब्रुवारीपासून सुरू होण्याचे संभाव्य वेळापत्रक जाहीर केले आहे. मात्र बारावीच्या प्रात्याक्षिक, तोंडी आणि अंतर्गत परीक्षा २० जानेवारी ते ६ फेब्रुवारी या कालावधीत घेण्यात येणार आहेत. नेमक्या याच दिवसांत अभियांत्रिकी प्रवेशासाठी अत्यंत महत्त्वाची असलेली जेईई मेन परीक्षेचे पहिले सत्र २२ जानेवारीपासून सुरू होणार आहे. दोन्ही परीक्षा एकाच काळात आल्याने विद्यार्थ्यांना मोठा धक्का बसला आहे.
राज्यात दरवर्षी राज्य मंडळाच्या परीक्षेसाठी लाखो विद्यार्थी बसतात तर जेईई मेनसाठी हजारो विद्यार्थी दीर्घकाळ तयारी करतात. गेल्या दोन वर्षांत कसून अभ्यास करून जेईईची तयारी करणारे विद्यार्थी आता एकाच वेळी दोन महत्त्वाच्या परीक्षा देण्याच्या परिस्थितीत सापडले आहेत. तोंडी आणि प्रात्यक्षिक परीक्षा तसेच जेईई मेन या दोन्हीकडे लक्ष देणे कठीण झाले आहे. अनेक विद्यार्थी आणि पालक या तारखांच्या घोळामुळे निकालावर आणि एकूण कामगिरीवर प्रतिकूल परिणाम होण्याची भीती व्यक्त करत आहेत.
या परिस्थितीमुळे विद्यार्थ्यांमध्ये प्रचंड मानसिक तणाव निर्माण झाला आहे. अभ्यासक्रम पूर्ण करणे, प्रात्यक्षिकांची तयारी करणे आणि त्याचबरोबर जेईई मेनसाठी अंतिम सराव करणे हे एकाच वेळी शक्य होत नाही, असा आवाज उठत आहे. विशेषतः छत्रपती संभाजीनगरसारख्या शहरातील विद्यार्थी याबाबत अधिक चिंता व्यक्त करत आहेत. पालकही म्हणतात की, वेळापत्रक आधीच जाहीर झाले असते तर विद्यार्थी त्यानुसार नियोजन करू शकले असते. आता मात्र अचानक झालेल्या या एकाच कालावधीतील परीक्षांमुळे गोंधळ माजला आहे.
या पार्श्वभूमीवर विद्यार्थी आणि पालक संघटनांनी राज्य मंडळ व संबंधित यंत्रणेकडे मागणी केली आहे की, वेळापत्रकात तातडीने योग्य बदल करण्यात यावा. जेईई मेन आणि बोर्डाच्या तोंडी-प्रात्यक्षिक परीक्षा यांच्यातील संघर्ष टाळण्यासाठी पर्यायी तारखा निश्चित कराव्यात, अशी अपेक्षा व्यक्त केली जात आहे. विद्यार्थ्यांच्या भविष्याचा विचार करून दोन्ही परीक्षा सुलभतेने देता येतील अशी व्यवस्था करणे आवश्यक आहे, असे मत शिक्षण क्षेत्रातील जाणकारही व्यक्त करत आहेत.
