निवडणुकीच्या धावपळीत शिक्षकांवर संकलित चाचणीचे गुण भरायची जबाबदारी
शिक्षण विभागाने दिलेल्या लिंकनुसार शिक्षकांनी चाटबॉटवर गुण नोंदवावेत, असे पत्रक राहुल रेखाराव यांनी प्रसिद्ध केले आहे.
eduvarta@gmail.com 
एज्युवार्ता न्यूज नेटवर्क
शिक्षण विभागातर्फे (education department) घेण्यात आलेल्या संकलित मूल्यमापन चाचणी १ (PAT-2) चे गुण विद्या समीक्षा केंद्र यांच्यामार्फत उपलब्ध करून देण्यात येणाऱ्या पोर्टलवर भरावयाचे आहे. त्यासाठी चाटबॉट उपलब्ध करून देण्यात आला आहे. संबंधित शिक्षकांनी येत्या 11 नोव्हेंबर ते 26 नोव्हेंबर या कालावधीत गुण नोंदणीचे काम पूर्ण करावे,अशा सूचना राज्य शैक्षणिक व संशोधन प्रशिक्षण परिषदेचे संचालक राहुल रेखाराव (Rahul Rekharao, Director, State Council of Educational Research and Training) यांनी दिल्या आहेत. मात्र, याच कालावधीत अनेक शिक्षकांना निवडणुकीची कामे देण्यात आली आहेत. त्यामुळे गुण भरावेत की निवडणुकीची कामे करावीत, असा प्रश्न शिक्षकांसमोर उभा राहणार आहे.
राज्यातील शासकीय व स्थानिक स्वराज्य संस्थांच्या तसेच खाजगी अनुदानित शाळांमध्ये संकलित मूल्यमापन चाचणी 1 ही 22 ते 25 जुलै या कालावधीत घेण्यात आली. प्रथम भाषा, गणित, तृतीय भाषा- इग्रजी या विषयांची संकलित मूल्यमापन चाचणी घेतली गेली. संबंधित संकलित मूल्यमापन चाचणी 1 च्या तपासणीबाबत शिक्षकांना सूचित करण्यात आले होते. या मूल्यमापनाचे गुण विद्या समीक्षा केंद्रातर्फे उपलब्ध करून देण्यात आलेल्या पोर्टलवर भरण्यासंदर्भात यूट्यूबद्वारे पूर्वीच सूचना देण्यात आलेल्या आहेत. शिक्षण विभागाने दिलेल्या लिंकनुसार, शिक्षकांनी चाटबॉटवर गुण नोंदवावेत,असे पत्रक राहुल रेखाराव यांनी प्रसिद्ध केले आहे.
जिल्हा शिक्षणाधिकारी प्राथमिक व माध्यमिक शिक्षण निरीक्षक व प्रशासन अधिकारी महानगरपालिका व नगरपालिका यांनी आपल्या कार्यालयातील एका अधिकाऱ्याकडे PAT जिल्हा समन्वयक म्हणून जबाबदारी यापूर्वीच निश्चित केलेली आहे. संबंधित जिल्हा समन्वयकांनी सर्व शिक्षकांना संकलित मूल्यमापन चाचणी एकचे गुण कसे भरावेत याबाबत आवश्यक मार्गदर्शन करावे, असेही या परिपत्रकात स्पष्ट करण्यात आले आहे.
---------------
दिवाळीच्या सुट्ट्यानंतर शाळा सुरू झाल्या असून शिक्षकांसमोर अनेक कामे आहेत. त्याचप्रमाणे काही शिक्षकांना निवडणुकीचे प्रशिक्षण दिले जात आहे. त्यानंतर सुमारे तीन दिवस प्रत्यक्ष निवडणुकीचे काम करावे लागणार आहे. परिणामी शिक्षकांना गुण नोंद करण्यासाठी दिलेला अवधी हा अपुरा पडणार आहे. त्यामुळे गुण नोंद करण्यासाठी दिलेल्या वेळापत्रकात बदल करावा, अशी मागणी मुख्याध्यापक महासंघाचे महेंद्र गणपुले यांनी केली आहे.
