‘या’ विद्यार्थ्यांसाठी निवासी गुरुकुल सुरू करणार; मंत्री पंकज भोयर यांचे मोठे वक्तव्य

एज्युवार्ता न्यूज नेटवर्क

पूर्वप्राथमिक शाळांसंदर्भातील (Pre-primary schools) निश्चित धोरणासहच विद्यार्थ्यांमधील विशेष गुणांवर (special qualities among student) आधारित अभ्यासक्रम म्हणजेच ज्यांना क्रीडा, कला व इतर क्षेत्राची आवड आहे त्यांच्यासाठी शासनामार्फत आठ निवासी गुरुकुल (Residential Gurukul) सुरू करण्यात येणार असल्याची घोषणा शालेय शिक्षण राज्य मंत्री पंकज भोयर (Minister of State for School Education Pankaj Bhoyer) यांनी केली आहे. विद्याभारती अखिल भारतीय शिक्षा संस्थान (Vidyabharati All India Institute of Education) आणि डेक्कन एज्युकेशन सोसायटी (Deccan Education Society) यांच्या संयुक्त विद्यमाने पुण्यातील फर्ग्युसन महाविद्यालयात (at Fergusson College, Pune) पुणे शिक्षण परिषदेचे (Pune Education Council) आयोजन करण्यात आले होते. या परिषदेचे उद्घाटन शालेय शिक्षण राज्यमंत्री पंकज भोयर यांच्या हस्ते करण्यात आले. यावेळी ते बोलत होते.  

पुढे बोलताना, येणाऱ्या काळात शासनामार्फत नवीन शैक्षणिक धोरणात अनेक महत्वाचे बदल होणार आहेत. त्यानुसार विद्यार्थ्यांना केवळ पुस्तकी ज्ञान असून उपयोग नाही तर त्यांना इतर क्षेत्राचंही ज्ञान मिळावं यासाठी शासन प्रयत्नशील आहे. त्यातून विद्यार्थ्यांना सर्व गोष्टींचा अनुभव घेता येईल असेही ते म्हटले आहे.    

या कार्यक्रमात राज्य अभ्यासक्रम आराखड्या संबंधित असलेल्या विविध विषयांवर आधारित चर्चासत्राचे आयोजन करण्यात आले होते. त्यामध्ये पायाभूत शिक्षण या विषयावर डॉ. मधुश्री सावजी आणि संतोष भणगे यांचे सत्र आयोजित करण्यात आले. शालेय शिक्षण या विषयावर डॉ. मिलिंद नाईक आणि डॉ. महेश्वर कळलावे यांचे व्याख्यान होते. याबरोबरच अध्यापन शास्त्र या विषयावर डॉ. अजय महाजन, भारतीय शिक्षण परंपरा यावर आचार्य श्रेयस कुऱ्हेकर, कौशल्य शिक्षण या विषयावर शोभना भिडे, शाळा संकुल व अन्य विषयांवर रमेश देशपांडे, पंचकोश विकसन यासाठी आदित्य शिंदे आणि शिक्षणाचे भारतीयीकरण या विषयावर पद्मश्री गिरीश प्रभुणे यांनी उपस्थितांना मार्गदर्शन केले. आणि विविध विषयांवर चर्चा केली.

यावेळी डेक्कन एज्युकेशन सोसायटीचे कार्यवाह आनंद काटीकर, डेक्कन एज्युकेशन सोसायटीच्या नियामक मंडळाचे अध्यक्ष प्रमोद रावत, राष्ट्रीय स्वयंसेवक संघ पश्चिम प्रांत संघचालक नाना जाधव, विद्या भारतीचे अध्यक्ष अरुण कुलकर्णी, विद्या भारती पुणे शाखेचे अध्यक्ष रघुनाथ देवीकर, डॉ. श्रीपाद ढेकणे यांच्यासह अनेक शैक्षणिक संस्थाचे संस्थाचालक, शिक्षणतज्ञ व इतर मान्यवर मोठ्या संख्येने उपस्थित होते.