मराठीतील ख्यातनाम प्राध्यापक वाय.पी. कुलकर्णी यांचे निधन

एज्युवार्ता न्यूज नेटवर्क

मराठीतील ख्यातनाम प्राध्यापक, पुणे विद्यापीठाच्या मराठी अभ्यास मंडळाचे माजी अध्यक्ष आणि सिनेट मेंबर प्रा.वाय.पी.कुलकर्णी (Prof. Y. P. Kulkarni, Former President and Senate Member of Pune University's Board of Marathi Studies) यांचे वयाच्या ९४व्या वर्षी नाशिक येथे निधन (passed away) झाले. सावित्रीबाई फुले पुणे विद्यापीठामध्ये (Savitribai Phule Pune University) 'व्यावहारिक मराठी' (Practical Marathi) हा अभ्यासक्रम प्रथमतः तयार करून तो आग्रहपूर्वक अमलात आणण्याचे महत्त्वाचे कार्य त्यांनी केले. पुणे विद्यापीठानंतर अनेक विद्यापीठांनी व्यावहारिक मराठीचा अभ्यासक्रम सुरू केला.

वाय.पी.कुलकर्णी यांनी मराठी भाषेसाठी महत्वपूर्ण योगदान दिले. निवृत्त होऊन जवळपास ३४ वर्षे झाली तरीही ते मराठी भाषा संवर्धन आणि विकासाच्या कामासाठी योगदान देत राहिले. व्यावहारिक मराठी या विषयाला शासन स्तरावर मान्यता मिळावी यासाठी त्यांनी विशेष प्रयत्न केले आहेत. त्यांच्या या प्रयत्नामुळे केवळ सावित्रीबाई फुले पुणे विद्यापीठालाच नाही तर राज्यातील सर्व विद्यापीठांमध्ये व्यावहारिक मराठी ही अनुदानित स्तरावर मान्य करण्यात आली. सावित्रीबाई फुले पुणे विद्यापीठात कला शाखेचे अधिष्ठाता म्हणूनही त्यांनी काम पाहिले, असे पुणे विद्यापीठातील मराठी अभ्यास मंडळाचे अध्यक्ष संदीप सांगळे यांनी सांगितले.