पुण्यात सर्वाधिक प्री प्रायमरी स्कूलची नोंद; ठाणे दुसऱ्या क्रमांकावर

एज्युवार्ता न्यूज नेटवर्क

वय वर्ष ३ ते ६ वयोगटातील बालकांना अंगणवाड्या, बालवाड्या, शाळेला जोडून पूर्व प्राथमिक वर्ग व खाजगी पूर्व प्राथमिक वर्ग (Junior KG) यामधून शिक्षण दिले जाते. शासकीय व स्थानिक स्वराज्य संस्थांच्या बालवाड्या व अंगणवाड्या यांची नोंदणी व माहिती महिला व बाल विकास विभाग यांच्याकडे उपलब्ध आहे. तथापि खाजगी पूर्व प्राथमिक वर्गाची अधिकृत माहिती सद्यःस्थितीमध्ये शासनाकडे उपलब्ध नसल्यामुळे शिक्षण विभागाने (department of education) १५ दिवसांपूर्वी अशा शाळांची नोंदणी प्रक्रिया (Registration Process) सुरु केली आहे. त्यामध्ये राज्यात आतापर्यंत ११ हजार १७३ पूर्व प्राथमिक शाळांनी नोंदणी केल्याचे शिक्षण विभागाच्या ताज्या अहवालात म्हटले आहे. तर पुण्यात सर्वाधिक ज्युनिअर केजीच्या शाळांची नोंद झाली आहे. 

या खाजगी शाळांमध्ये मुलांना योग्य त्या सोयी-सुविधा आहेत का? पाल्यांसाठी तिथले वातावरण कसे आहे, याची माहिती मिळावी म्हणून शिक्षण विभागाने ही नोंदणी प्रक्रिया सुरु केली आहे. त्याचबरोबर बालकाला मोफत, सुरक्षित आणि गुणवत्तापूर्ण शिक्षण देण्याच्या उद्देशाने शिक्षण विभागाने हे महत्वाचे पाऊल उचलले आहे.

वयोगट ३ ते ६ साठी पूर्व प्राथमिक शिक्षण देणाऱ्या सर्व खाजगी केंद्रांची माहिती एकत्रित स्वरुपात राज्यस्तरावर, जिल्हास्तरावर तसेच पालकांनाही उपलब्ध असणे आवश्यक आहे. यासाठी वयोगट ३ ते ६ यांना शिक्षण देणारे केंद्र Pre. School, Nursery. Jr. K.G.. Sr. K. G., पूर्व प्राथमिक वर्ग अशा कोणत्याही नावाने सुरु असलेल्या, वयोगट ३ ते ६ मधील विद्यार्थ्यांना शिक्षण देणाऱ्या खाजगी केंद्रांची नोंदणी करण्यासाठी Pre School Registration पोर्टल शासनाकडून सुरु करण्यात आले आहे. यामध्ये ३ ते ६ वर्षे वयोगटातील विद्याध्यर्थ्यांना पूर्व प्राथमिक शिक्षण देणाऱ्या खाजगी केंद्रांची सर्वसाधारण माहिती, व्यवस्थापनाची माहिती, विद्याची संख्या, भौतिक सुविधा, कार्यरत शिक्षक व शिक्षकेतर कर्मचारी माहिती यांची नोंद पोर्टलवर करावयाची आहे.

पुर्व प्राथमिक शिक्षण देणा-या खाजगी केंद्रांच्या नोंदणीसाठी येणा-या अडचणीचे निराकरण करण्यासाठी समिती स्थापन करण्यात यावी व त्यांची नावे व संपर्क क्रमांक सर्वांना कळवावा. तसेच उपरोक्त समित्यांनी सदर उपक्रमाची अंमलबजावणी करताना येणा-या अडचणी/शंका यांचे निरसन करावे. राज्य स्तरावर मदत केंद्र देखील स्थापन करण्यात आले आहे. आवश्यकतेनुसार आपण खालील नमूद अधिकारी यांचेशी संपर्क करावा असेही शिक्षण विभागामार्फत सांगण्यात आले आहे.  

प्री स्कूलची जिल्हानिहाय संख्या पुढीलप्रमाणे

पुणे- १,८५०, ठाणे-१,१३४ , अहिल्यानगर-६६०, नागपूर ६२६, मुंबई महापालिका अंतर्गत- ३६२, मुंबई शिक्षण उपसंचालक अंतर्गत-११८, नाशिक- ४८६, नांदेड- ३४७, कोल्हापूर- ४०५, छत्रपती संभाजीनगर - ६१६, लातूर- ३३१, नांदेड- ३४७, रायगड- ३११, सोलापूर- ३४७, जळगाव- ३११ उर्वरित जिल्ह्यांमध्ये प्रत्येकी ३०० पेक्षा कमी संख्येने शाळांची नोंदणी झाली आहे.