विद्यापीठाला सोमवारी सुट्टी; जिल्हाधिकाऱ्यांच्या निर्णयानंतर विद्यापीठाचे परिपत्रक 

एज्युवार्ता न्यूज नेटवर्क 

पुणे ग्रैंड चॅलेंज टूर २०२६ ही आंतरराष्ट्रीय सायकलिंग स्पर्धा १९ जानेवारी ते २३ जानेवारी २०२६ या कालावधीत पुणे जिल्हयात होणार असून २९ ऑक्टोबर २०२५ रोजी मुख्यमंत्री यांच्या हस्ते उद्घाटन करण्यात आले आहे. पुणे शहरात येत्या १९ जानेवारी २०२६ रोजी प्रोलॉग रेस होणार आहे. त्यामुळे विद्यापीठाला सुट्टी देण्यात आली आहे, याबाबतचे परिपत्रक विद्यापीठातर्फे प्रसिद्ध करण्यात आले आहे.

 जिल्हाधिकारी यांच्या आदेशानुसार पुणे ग्रँड चॅलेंज टूर २०२६ या आंतरराष्ट्रीय सायकलिंग स्पर्धेच्या अनुषंगाने पुणे महापालिकेच्या छत्रपती शिवाजी नगर घोले रोड, विश्रामबाग वाडा कसबा, ढोले पाटील रोड, भवानी पेठ, औंध बाणेर, कोथरुड बावधन, सिंहगड रोड, वारजे कर्वेनगर या क्षेत्रिय कार्यालयाचे हद्दीतील सर्व आंगणवाडी, शासकीय व खाजगी प्राथमिक/माध्यमिक शाळा, आश्रमशाळा, मनपा व नगरपालिकेच्या शाळा, महाविद्यालये, आयुक्त व्यवसाय व प्रशिक्षण केंद्र, व्यावसायिक शैक्षणिक संस्थांना १९ जानेवारी रोजी होणाऱ्या प्रोलॉग रेसच्या दिवशी सुट्टी जाहिर करण्यात आलेली आहे.या पार्श्वभूमीवर पुणे जिल्हयात होत असलेल्या पुणे ग्रैंड चॅलेंज टूर २०२६ या आंतरराष्ट्रीय स्पर्धेअंतर्गत होणाऱ्या प्रोलॉग रेस करिता विद्यापीठ कार्यालयास दिनांक १९ जानेवारी, २०२६ रोजी सुट्टी जाहीर करणे आवश्यक आहे.

 प्राप्त आदेशानुसार या परिपत्रकाद्वारे सर्व संबंधितांना कळविण्यात येते की, सोमवार, दिनांक १९ जानेवारी, २०२६ रोजी विद्यापीठ कार्यालयास सुट्टी जाहीर करण्यात येत आहे.विद्यापीठ आस्थापनेतील स्थावर विभाग सुरक्षा विभाग व आरोग्य केंद्र हे विभाग अत्यावश्यक सेवा अतंर्गत येत असल्याने सदर विभागांचे कामकाज नेहमीप्रमाणे सुरु राहील. सदर विभागातील संबंधितांना सदर दिवसाची पर्यायी रजा नंतर देय राहील. त्याचप्रमाणे कोणत्याही अत्यावश्यक कार्यालयीन कामकाजाकरिता वरिष्ठांनी संबंधितास कार्यालयात बोलविल्यास त्यांना कार्यालयामध्ये त्वरीत उपस्थित राहणे अनिवार्य राहील, याची सर्व संबंधितांनी नोंद घ्यावी, असे विद्यापीठाने स्पष्ट केले आहे.