विद्यापीठात 133 कंत्राटी प्राध्यापक पदाची भरती: जाहिरात प्रसिद्ध,अर्ज केव्हा भरता येणार

एज्यूवार्ता न्यूज नेटवर्क

Pune University Recruitment : सावित्रीबाई फुले पुणे विद्यापीठातील (Savitribai Phule Pune University) विविध विभागांमध्ये कंत्राटी पद्धतीने 133 सहाय्यक प्राध्यापकांच्या जागा (133 Assistant Professor posts on contractual basis) भरल्या जाणार आहेत. दरमहा चाळीस हजार रुपये पगारावर 31 मे 2025 पर्यंत या पदावर काम करता येणार आहे. इच्छुक उमेदवारांना 27 ऑगस्ट ते 5 सप्टेंबर या कालावधीमध्ये ऑनलाईन पद्धतीने अर्ज करता येणार आहेत. विद्यापीठाच्या https://admin.unipune.ac.in/recruitment/ या संकेतस्थळावर याबाबतची जाहिरात प्रसिद्ध करण्यात आली आहे.

सावित्रीबाई फुले पुणे विद्यापीठाच्या विविध विभागांमध्ये प्राध्यापकांच्या 111 रिक्त पदांच्या भरतीसाठीची प्रक्रिया विद्यापीठ प्रशासनाकडून राबवली जात आहे. परंतु, मराठा आरक्षण (एसइबीसी) लागू करून भरती प्रक्रिया राबवावी लागणार असल्याने त्यास काहीसा विलंब होणार आहे. विद्यापीठात प्राध्यापकांची पदे रिक्त असल्याने विभाग चालवणे अडचणीचे होत आहे. त्यामुळे विद्यापीठाने पुन्हा एकदा कंत्राटी तत्वावर सहाय्यक प्राध्यापकांची पदे भरण्याचा निर्णय घेतला आहे. ही पदे आरक्षण निहाय भरली जाणार आहेत. 

विज्ञान व तंत्रज्ञान विद्याशाखेतील पदांसह वाणिज्य व व्यवस्थापन विद्या शाखा, मानव्य विज्ञान विद्याशाखा आणि आंतरविद्याशाखीय अभ्यास विद्याशाखा या सर्व विद्याशाखे अंतर्गत येणाऱ्या विभागांमधील पदे भरली जाणार आहेत. त्याचप्रमाणे स्पर्धा परीक्षा केंद्रासाठी 4 पदे तर विद्यापीठाच्या नाशिक केंद्रामधील मॅनेजमेंट सायन्स विभागाच्या 4 पदासाठी सुद्धा जाहिरात देण्यात आली आहे.

कंत्राटी पद्धतीने भरल्या जाणाऱ्या सहाय्यक प्राध्यापक पदाच्या उमेदवारांसाठी कोणती पात्रता असेल. तसेच उमेदवारांनी अर्ज भरताना कोणती काळजी घ्यावी, याबाबतची सविस्तर माहिती विद्यापीठाने प्रसिद्ध केलेल्या जाहिरातीत नमूद करण्यात आली आहे.