स्पर्धा परीक्षांचा अभ्यास करणाऱ्या विद्यार्थ्यांचा पुण्यात उद्या ‘आक्रोश’

एज्युवार्ता न्यूज नेटवर्क

राज्य सरकारने (Maharashtra Government) खासगी कंपन्यांमार्फत नोकर भरती (Recruitment) करण्याचा निर्णय घेतल्याने स्पर्धा परीक्षांचा (Competitive Examination) अभ्यास करणाऱ्या विद्यार्थ्यांमध्ये नाराजी निर्माण झाली आहे. त्याचप्रमाणे सध्या सुरू असलेल्या तलाठी भरतीमध्येही (Talathi Bharti 2023) सातत्याने गैरप्रकार उघडकीस येत आहेत. त्यानंतर परीक्षा सुरूच असल्याने विद्यार्थ्यांमध्ये असंतोष वाढू लागला आहे. शासनाच्या या भूमिकेचा निषेध करण्यासाठी पुण्यात शुक्रवारी विद्यार्थी आक्रोश आंदोलन करणार आहेत. (Students Protest in Pune)

स्पर्धा परीक्षा समन्वय समितीकडून हे आंदोलन केले जाणार आहे. पुण्यातील जिल्हाधिकारी कार्यालयासमोर सकाळी दहा वाजता आंदोलनाला सुरूवात होणार आहे. सरकारी नोकऱ्यांचे कंत्राटीकरण करण्याबाबतचा शासन निर्णय रद्द करावा आणि भ्रष्ट मार्गाने पार पडलेली तलाठी भरती स्थगित करून फेरपरीक्षा घेण्यात यावी, या प्रमुख मागण्या आहेत.

MPSC चा सुखद धक्का; लिपिक-टंकलेखक पदाच्या निकालाबाबत तीन महत्वाचे निर्णय

राज्य सरकारने ६ सप्टेंबर रोजी परिपत्रक काढून येणाऱ्या काळात सरकारी नोकर भरतीचे खाजगीकरण करून कंत्राटीकरणाच्या माध्यमातून भरती घेण्याचा निर्णय घेतला आहे. यामुळे महाराष्ट्रातील लाखो विद्यार्थी जे अनेक वर्षापासून सरकारी नोकरीच्या आशेने अभ्यास करत आहेत त्यांच्या भविष्याचा प्रश्न निर्माण झाला आहे. यामुळे महाराष्ट्रातील लाखो विद्यार्थ्यांच्या मनात असंतोष निर्माण झाला आहे, असे समितीने म्हटले आहे.

सासनाच्या निर्णयाविरोधात आम्ही सर्व विद्यार्थ्यांनी १५ सप्टेंबर रोजी जिल्हाधिकारी कार्यालयासमोर आक्रोश आंदोलन करण्याचा निर्धार केला आहे. सर्व विद्यार्थ्यांनी मोठ्या संख्येने या आंदोलनात सहभागी व्हावे, असे आवाहन समितीने केले आहे. दरम्यान, राज्य सरकारच्या कंत्राटी भरतीच्या विरोधात विरोधी पक्षांनीही मोर्चा उघडला आहे. विरोधकांकडून सरकारला धारेवर धरले जात आहे. मात्र, राज्य सरकारमधील मंत्र्यांकडून या निर्णयाचे समर्थन केले जात असल्याने नाराजी वाढू लागली आहे.