पेट परीक्षेला तांत्रिक कारणाने पाऊण तास उशीर; पण परीक्षा सुरळीत, निकाल १२ सप्टेंबरपर्यंत

एज्युवार्ता न्यूज नेटवर्क 

सावित्रीबाई फुले पुणे विद्यापीठातर्फे (Savitribai Phule Pune University) विविध विभागामधील व संलग्न महाविद्यालयातील संशोधन केंद्रातील पीएचडी प्रवेशासाठी ऑनलाईन पीएचडी प्रवेश पूर्व परीक्षा (PhD Entrance Exam) 31 ऑगस्ट रोजी आयोजित करण्यात आली. मात्र, काही तांत्रिक कारणामुळे ही पेट परीक्षा अर्धा तास उशीरा (PET exam delayed by half an hour due to some technical reason) सुरू करावी लागली. त्यामुळे विद्यार्थ्यांचा काहीसा गोंधळ उडाला. परंतु, दुसऱ्या सत्रापासून परीक्षा सुरळीतपणे सुरू झाली. दरम्यान, चार सत्रात घेण्यात आलेल्या पेट परीक्षेस सुमारे 84. 93 टक्के उपस्थित होते. येत्या १२ सप्टेंबरपर्यंत पेट परीक्षेचा निकाल घोषीत करण्यात येईल, विद्यापीठाच्या शैक्षणिक प्रवेश विभागाचे उपकुलसचिव डॉ.मुंजाजी रासवे यांनी सांगितले.

 विद्यापीठाने 24 ऑगस्ट रोजीची परीक्षा 31 ऑगस्ट रोजी घेण्याचे जाहीर केले. त्यानुसार आज विविध परीक्षा केंद्रांवर ही परीक्षा वेळेवर सुरू होणे अपेक्षित होते. परंतु, याबाबत नियोजन करण्यात विद्यापीठाला अपयश आल्याचे दिसून आले.याबाबत युवासेनेचे सहसचिव कल्पेश यादव यांनी सोशल मीडियावर शनिवारी सकाळी पोस्ट शेअर केली होती. 

सावित्रीबाई फुले पुणे विद्यापीठाची पीएच.डी. प्रवेश परीक्षा 2024 (PET) काही अपवाद वगळता सुरळीतपणे पार पडली.  विद्यापीठ कार्यक्षेत्रातील पुणे, अहमदनगर व नाशिकच्या एकूण १८ केंद्रावर ४० विषयासाठी ही परीक्षा घेण्यात आली. या परीक्षेसाठी सुमारे १० हजार ७०० विद्यार्थ्यांनी अर्ज केले होते. त्यापैकी ९ हजार १२८ विद्यार्थ्यांनी उपस्थित राहून पेटची परीक्षा दिली. 

 पीएच.डी. प्रवेश परीक्षा २४ ऑगस्ट  रोजी घेतली जाणार होती. परंतु, बदलापूर घटनेच्या पार्श्वभूमीवर महाराष्ट्र बंदची हाक दिल्याने ही परीक्षा ३१ ऑगस्ट रोजी घेण्यात आली. त्यानुसार शनिवारी रोजी ही प्रवेश परीक्षा सुरळीतपणे पार पडली असे विद्यापीठातर्फे कळविण्यात आले आहे.