पालिकेने दिली अचानक मराठी शाळा बंद करण्याची नोटीस; २६० विद्यार्थ्यांचे भविष्य टांगणीला

एज्युवार्ता न्यूज नेटवर्क 

मुंबई महापालिकेच्या अंतर्गत येणारी पवई येथील दुर्गा देवी मराठी शाळा (Durga Devi Marathi School Powai) अचानक बंद करण्याची नोटीस (School closure notice) आल्याने पालकांमध्ये एकच आक्रोस सुरू झाला आहे. या शाळेत बालवाडी ते आठवी पर्यंत एकूण २६० विद्यार्थी शिक्षण घेत आहेत. इथे रस्त्याचे काम सुरू असताना एका वर्गाच्या भिंतीला जेसीबी चा धक्का लागला आणि भिंतीचा काही भाग खचला. बैठ्या स्थितीमध्ये असलेल्या या शाळेचा एक वर्ग बंद करण्याऐवजी ही संपूर्ण शाळाच धोकादायक झाली असल्याचा ठपका ठेवत ही शाळा बंद करून दोन किमी लांब असलेल्या पालिकेच्या दुसऱ्या शाळेत स्थलांतरित करण्याचे आदेश दिले आहेत. त्यामुळे परिसरातील विद्यार्थ्यांचे भविष्य टांगणीला लागले आहे. 

ही शाळा चांदिवलीच्या मध्यावर मोक्याच्या ठिकाणी असल्याने हे आजूबाजूच्या विकासकांचे षडयंत्र असल्याचा संशय नागरिकांकडून व्यक्त करण्यात येत आहे. मात्र बाजूच्या झोपडपट्ट्या मध्ये घरकाम करणाऱ्या लोकांची ही मुले असल्याने इतक्या दूर ते शिकायला पाठवणार नाही आणि मुल शिक्षणापासून वंचित राहतील अशी भीती आहे. यामुळे ही शाळा इथेच सुरू राहावी म्हणून या शाळेसमोर पालक आणि विद्यार्थी यांनी निदर्शने करत ही मराठी पालिकेची शाळा वाचविण्याची विनंती केली आहे. त्यानंतर विरोधी पक्षाने हा मुद्दा उचलून धरला आहे. 
______________________________________

मोक्याच्या जागा बघायच्या आणि त्या आपल्या कंत्राटदार मित्रांच्या घशात घालायच्या, हा पॅटर्नच सत्ताधाऱ्यांनी सुरु केलाय. आता चांदिवलीतील महानगरपालिकेच्या मराठी शाळेवर निशाणा साधला गेलाय. ‘भिंत पडली म्हणून शाळा बंद करा’ असं क्षुल्लक कारण देऊन, शाळेला नोटीस पाठवण्यात आलीय. तसेच दोन किलोमीटर लांब असलेल्या पालिकेच्या दुसऱ्या शाळेत मुलांना स्थलांतरित करा, असा थेट आदेशही देण्यात आलाय. मुळात एक भिंत पडल्यावर संपूर्ण शाळा कशी काय बंद करू शकतो? ह्या शाळेतील कित्येक गरीब विद्यार्थ्यांचं भविष्य पणाला लागलंय. ही मराठी शाळा वाचलीच पाहिजे! कुण्या विकासकांसाठी आम्ही मराठी शाळा बंद पडू देणार नाही!

आदित्य ठाकरे, आमदार शिवसेना (उद्धव बाळासाहेब ठाकरे)