विद्यापीठातील 111 प्राध्यापक भरतीची नवी जाहिरात आठवड्याभरात ; एसईबीसी आरक्षणाचा समावेश

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University) विविध विभागांमधील प्राध्यापकांच्या 111 रिक्त पदांच्या भरतीसाठी(Recruitment of 111 Vacancies of Professors) पुढील दोन-तीन दिवसात नव्याने जाहिरात (New Advertisement) प्रसिद्ध केली जाणार आहे. पूर्वी प्रसिध्द केलेल्या जाहिरातीचा विचार करता या पदांच्या आरक्षणात काहीसा बदल होणार आहे. त्यामुळे उमेदवारांना एसईबीसी आरक्षण लागू करून उपलब्ध झालेल्या जागांनुसार अर्ज करण्याची संधी दिली जाणार आहे. परिणामी उमेदवारांच्या प्रत्यक्ष मुलाखती घेऊन पात्र उमेदवारांना नियुक्ती देण्यास डिसेंबर महिना किंवा नवीन वर्ष उजाडू शकते, असा अंदाज विश्वसनीय सूत्रांनी व्यक्त केला आहे. 

विद्यापीठातर्फे 111 पदांसाठी फेब्रुवारी 2024 पर्यंत पात्र उमेदवारांकडून अर्ज स्वीकारण्यात आले. तब्बल पाच हजाराहून अधिक उमेदवारांनी विद्यापीठाकडे अर्ज केले.मात्र, प्राध्यापक भरतीसाठी मराठा आरक्षण लागू करण्यास राज्य शासनाने मान्यता दिली. त्यामुळे सुधारित जाहिरात प्रसिध्द करून पद भरती केली जाणार आहे. त्यामुळे येत्या आठवड्याभरात सुधारित जाहिरात विद्यापीठाच्या संकेतस्थळावर प्रसिद्ध केली जाणार आहे. ज्या उमेदवारांना मराठा आरक्षणाचा लाभ घ्यायचा आहे, असे उमेदवार या बदलाचा फायदा घेऊ शकतील.

प्रामुख्याने बदललेल्या जाहिरातीमध्ये खुल्या संवर्गातील आणि नव्याने समाविष्ट करण्यात आलेल्या दहा टक्के एसईबीसी संवर्गातील जागांमध्ये बदल झालेला दिसून येणार आहे. तसेच काही कारणांमुळे फेब्रुवारी महिन्यात अर्ज न करू शकलेले उमेदवार आहेत. आता अर्ज करू शकतील. त्यामुळे विद्यापीठातील 111 पदांच्या भरतीसाठी अर्ज करणाऱ्या उमेदवारांच्या संख्येत आणखी वाढ होण्याची शक्यता आहे, असेही सूत्रांनी सांगितले.