मुंबई विद्यापीठाच्या उन्हाळी सत्र परीक्षा आजपासून सुरू 

एज्युवार्ता न्यूज नेटवर्क 

मुंबई विद्यापीठाने (Mumbai University) उन्हाळी सत्र परीक्षा घेण्यास आजपासून सुरुवात (Summer session exams starts) केली आहे. बी. कॉम सत्र ६च्या अभ्यासक्रमासह (B. Com Semester 6 Syllabus) विविध परीक्षा घेतल्या जाणार आहेत. विद्यापीठाच्या मुंबई, मुंबई उपनगर, ठाणे, रायगड, रत्नागिरी, सिंधुदुर्ग, पालघर या जिल्ह्यांतील संलग्नित महाविद्यालयांतील एकूण २८४ परीक्षा केंद्रांवर ही परीक्षा घेतली जाणार आहे. यासाठी ८२ हजार ९९५ इतके विद्यार्थी परीक्षेला बसणार असून त्यानुसार संपूर्ण तयारी करण्यात आली असल्याची माहिती परीक्षा व मूल्यमापन मंडळाच्या संचालिका डॉ. पूजा रौंदळे (Dr. Pooja Raundle) यांनी दिली आहे.

बी. कॉम सत्र ६ च्या परीक्षेसह स्वयअर्थसहाय्यित बीएएमएस, अकौंटिंग फायनान्स, बँकिंग अँड इन्श्युरन्ससह इतरही अभ्यासक्रमांच्या परीक्षांचे विद्यापीठाने आयोजन केले आहे. विद्यार्थ्यांना याआधीच त्यांच्या लॉगिनमध्ये सर्व परीक्षांची हॉल तिकिटे उपलब्ध करून दिली आहेत. 

या परीक्षांना एकूण ८२ हजार ९९५ एवढे विद्यार्थ्यांनी परीक्षेसाठी नोंदणी केली आहे. त्यामध्ये ७३ हजार ३०९ नियमित तर, ९ हजार ६९२ पुनर्परीक्षार्थी विद्यार्थ्यांचा समावेश आहे. एकूण ३९ हजार ६१७ मुली आणि ४३ हजार ३७७ मुलांचा समावेश आहे. बी.कॉम. परीक्षेसाठी ५४ हजार ८९२ विद्यार्थी प्रविष्ट आहेत. त्यामध्ये २८ हजार ६११ मुले आणि २६ हजार २७४ मुलींचा समावेश आहे. 

विद्यापीठाच्या परीक्षा विभागाने या सर्व परीक्षांच्या तयारीचा आढावा घेतला आहे. सर्व लीड आणि क्लस्टर महाविद्यालयांच्या बैठका घेतल्या आहेत. परीक्षा पद्धतीत बदल करत विद्यापीठाने यापूर्वीच ऑनलाईन उपस्थिती, बारकोड व सर्व माहिती असणाऱ्या स्टीकरचा वापस करण्यास सुरुवात केली आहे, अशी माहिती परीक्षा व मूल्यमापन मंडळाच्या संचालिका डॉ. पूजा रौंदळे यांनी दिली.