मुंबई विद्यापीठाने आजच्या नियोजित परीक्षा पुढे ढकलल्या, नवीन तारखा जाहीर

एज्युवार्ता न्यूज नेटवर्क 

मागील दोन दिवसांपासून सतत पडणाऱ्या पावसामुळे मुंबईसह (Mumbai Rain News) राज्यातील विविध जिल्ह्यांमधील जनजीवन विस्कळीत झाले आहे. पावसामुळे मुंबईतील लोकलसह रस्ते वाहतूक सुविधा कोलमडली आहे. त्या पार्श्वभूमीवर विद्यार्थ्यांची गैरसोय टाळण्यासाठी मुंबई विद्यापीठाने (Mumbai University) पुर्वनियोजित सेंटर फाॅर डिस्टन्स अँड ऑनलाइन एज्युकेशन (CDOE) परीक्षा पुढे ढकलली (Exam postponed) आहे. ९ जुलै रोजी होणारी ही परीक्षा आता १३ जुलै रोजी होणार (The exam will now be held on July 13) आहे.

सुधारित तारखेची घोषणा करताना CDOE मुंबई विद्यापीठाने सांगितले आहे की, सेमिस्टर परीक्षांचे ठिकाण किंवा परीक्षा केंद्र तेच राहील. सीडीओईने ९ जुलै रोजी होणाऱ्या परीक्षांचे वेळापत्रक बदलले आहे. ९ जुलैच्या परीक्षा आता १३ जुलै रोजी पहिल्या सत्रात सकाळी ११ ते २ या वेळेत घेतल्या जातील.

आज ९ जुलै रोजी होणाऱ्या बीए एफवाय आणि बीकॉम  एफवाय सेमिस्टर-1, एफवाय बीएससी माहिती तंत्रज्ञान सेमिस्टर 2  च्या परीक्षा 18 जुलै रोजी सकाळी 11 ते दुपारी 2 या वेळेत आयोजित केल्या आहेत. तर बी एस्सी एफवाय कॉम्प्युटर सायन्स सेमिस्टर 2 ची परीक्षा 18 जुलै दुपारी 3 ते 5:30 या वेळेत घेतली जाणार आहे. एमएमएस सेमिस्टर 2 ची परीक्षा 20 जुलै रोजी सकाळी 11 ते दुपारी 2 घेण्यात येईल. 

अतिवृष्टीच्या अनुषंघाने मुंबई, ठाणे जिह्यातील इयत्ता १ ली ते १२ वीच्या सर्व माध्यमांच्या आणि मंडळाच्या शाळा आणि कनिष्ठ महाविद्यालयातील विद्यार्थ्यांना सुट्टी जाहीर करण्यात आली आहे. शालेय व महाविद्यालयीन विद्यार्थी आणि पालकांची शाळा-काॅलेजमध्ये ये-जा करण्याची गैरसोय होऊ नये. याचा विचार करत विद्यार्थी आणि पालकांच्या दृष्टीकोनातून सुट्टी देण्याचे आदेश स्थानिक प्रशासनाकडून देण्यात आले आहेत.