मुंबई विद्यापीठ : चालू शैक्षणिक वर्षापासून मिळणार 'सर्वोत्कृष्ट विद्यार्थी पुरस्कार' 

एज्युवार्ता न्यूज नेटवर्क 

विद्यार्थ्यांना शिक्षणामध्ये प्रोत्साहित करण्यासाठी शासन आणि प्रशासन स्तरावर वेगवेगळ्या क्लृप्त्या वापरल्या जात आहेत. त्याचाच एक भाग म्हणून मुंबई विद्यापीठाकडून (Mumbai University) शैक्षणिक वर्षे २०२४-२५ (Academic year 2024-25) पासून उत्कृष्ट, प्रतिभावंत विद्यार्थ्यांना 'सर्वोत्कृष्ट विद्यार्थी पुरस्कार' (Best Student Award) देण्यात येणार आहे. विद्यापीठाचे विविध विभाग, संलग्न महाविद्यालयांमध्ये शिकत असलेल्या प्रत्येकी तीन मुले आणि मुलींना प्लॅटिनम, डायमंड व गोल्डन बॉय आणि गर्ल म्हणून हा पुरस्कार देण्यात येणार आहे. 

यामध्ये प्रथम स्थान मिळवणाऱ्या विद्यार्थ्याला रोख १५  हजार व सन्मानचिन्ह देवून गौरविण्यात येणार आहे.  यामध्ये प्लॅटिनम पुरस्कारासाठी १५ हजार रुपये आणि सन्मानचिन्ह, डायमंड पुरस्कारासाठी १२ हजार आणि सन्मानचिन्ह तसेच गोल्डन पुरस्कारासाठी १० हजार रुपये आणि सन्मानचिन्ह देण्यात येणार आहे.  

या पुरस्कारासाठी आंतरविद्यापीठ आणि राष्ट्रीय स्तरावरील संशोधन सादरीकरण, प्रकाशनांसाठीचे गुण, पेटंट, विभागस्तरावर आयोजित केलेले कार्यक्रम, स्पर्धामधील सहभाग, राष्ट्रीय  सेवा योजनेतील १२० तासांचे उपक्रम, ७ दिवसांच्या निवासी शिबिरातील सहभाग, एनसीसीतील सहभाग, शैक्षणिक कामगिरी आदी विविध निकषांचे काटेकोर मूल्यमापन करण्यात येणार आहे. या सर्व मूल्यमापनात पात्र ठरलेल्या उमेदवारांची निवड करून वरील पुरस्कार देण्यात येणार आहेत.

पात्र ठरण्यासाठी काय निकष असणार..

विद्यार्थी हा शेवटच्या सत्रात शिकत असावा. आधीच्या सत्रांमधील उपस्थिती ही सर्वसाधारण ७५ टक्केपेक्षा जास्त असावी. पूर्वीच्या सत्रात सर्व विषयात पहिल्या प्रयत्नात उत्तीर्ण हवा. विद्यार्थ्याविरुद्ध कोणत्याही प्रकारची शिस्तभंगाची कारवाई झालेली नसावी, असे निकष घालण्यात आले आहेत.