भूमी अभिलेख विभागात मेगा भरती, अर्ज प्रक्रिया सुरू
या भरती मोहिमेअंतर्गत सर्व विभागात मिळून एकूण 903 रिक्त जागा भरण्यात येणार आहेत. राज्यातील सर्व महसूल विभागामध्ये ही भरती राबवली जात आहे. भरती प्रक्रियेसाठी पात्र असलेल्या उमेदवारांना अधिकृत संकेतस्थळ mahabhumi.gov.in वर जाऊन अर्ज भरता येणार आहे.
eduvarta@gmail.com 
एज्युवार्ता न्यूज नेटवर्क
सरकारी नोकरीच्या शोधात असलेल्या उमेदवारांसाठी महत्त्वाची बातमी समोर आली आहे. राज्य शासनाने भूमी अभिलेख विभागात (Land Records Department) भूकरमापक (Land Surveyor) पदांसाठी भरती प्रक्रिया सुरू (Recruitment process started) केली आहे. यासाठी इच्छुक आणि पात्र उमेदवारांना ऑनलाईन पद्धतीने अर्ज करावा लागणार आहे. अर्ज करण्याची अंतिम तारीख २४ ऑक्टोबर आहे.
या भरती मोहिमेअंतर्गत सर्व विभागात मिळून एकूण 903 रिक्त जागा भरण्यात येणार आहेत. राज्यातील सर्व महसूल विभागामध्ये ही भरती राबवली जात आहे. भरती प्रक्रियेसाठी पात्र असलेल्या उमेदवारांना अधिकृत संकेतस्थळ mahabhumi.gov.in वर जाऊन अर्ज भरता येणार आहे. प्रसिद्ध करण्यात आलेल्या जाहिरातीनुसार, पुणे विभागात ८३ जागा, कोकण विभागात २५९ जागा, नाशिक विभागात १२४ जागा, छत्रपती संभाजीनगर विभागात २१० जागा, अमरावती विभागात ११७ जागा तर नागपूर विभागातील ११० जागांसाठी ही भरती असणार आहे.
शैक्षणिक पात्रता -
या भरती प्रक्रियेत सहभागी होण्यासाठी उमेदावाराने स्थापत्य अभियांत्रिकी पदविका (सिव्हिल इंजिनिअरिंग डिप्लोमा) किंवा १०वी उत्तीर्ण आणि ITI (सर्वेक्षक) प्रमाणपत्र असणे आवश्यक आहे. याशिवाय, उमेदवाराकडे मराठी टंकलेखन कमीत-कमी 30 शब्द प्रति मिनिट आणि इंग्रजी टंकलेखन कमीत-कमी 40 शब्द प्रति मिनिट या गतीसह शासकीय वाणिज्य प्रमाणपत्र किंवा संगणक टंकलेखन प्रमाणपत्र असणे आवश्यक आहे.
अर्ज करणाऱ्या उमेदवाराचे वय २४ ऑक्टोबर २०२५ रोजी किमान १८ वर्षे आणि जास्तीत जास्त ३८ वर्षे असावे. मागासवर्गीय उमेदवारांना वयोमयदित ५ वर्षांची सूट देण्यात आली आहे. सामान्य प्रवर्गातील उमेदवारांना १००० रुपये तर मागासवर्गीय उमेदवारांना ९०० रुपये परीक्षा शुल्क आकारण्यात आला आहे. अधिक आणि सविस्तर माहितीसाठी अधिकृत संकेतस्थळाला भेट देण्याचे आवाहन करण्यात आले आहे.
