गणित विषयाच्या शिक्षकांनीच नाही गिरवला गणिताचा धडा 

एज्युवार्ता न्यूज नेटवर्क 

नुकताच ASER ने जाहीर केलेल्या सर्वेक्षणातून धक्कादायक माहिती समोर आली असून १४ ते १८ वयोगटातील विद्यार्थ्यांना साधी सोपी गणिताची समीकरणे सोडवता येत नसल्याचे या अहवालातून निदर्शनास आले होते. आता या विद्यार्थ्यांचे गणिताचे पाठ घेणाऱ्या शिक्षकांनीच गणिताचा अभ्यास किंवा त्या विषयाची पदवी घेतली नसल्याचे समोर आले आहे. टाटा इन्स्टिट्यूट ऑफ सोशल सायन्सेस (TISS) मधील सेंटर ऑफ एक्सलन्स इन टीचर एज्युकेशन (CETE) ने 'प्रत्येक मुलासाठी योग्य शिक्षक' या विषयावर संशोधन केले होते. यामध्ये ही बाब उघड झाली आहे.

CETE च्या अहवालानुसार देशात गणित विषय  शिकवणाऱ्या एकूण शिक्षकांपैकी ४१ टक्के शिक्षकांनी पदवी पर्यंतचा अभ्यासक्रम पूर्ण केलेला नाही किंवा गणित या विषयाचा अधिकृतरीत्या अभ्यास  केलेला नाही. टाटा इन्स्टिट्यूटच्या म्हणण्यानुसार, आठ राज्यांतील सरकारी आणि खासगी शाळांमधील ३५ ते ४१ टक्के गणित शिक्षकांकडे पदवी स्तरावर गणित हा विषय नव्हता.  'प्रत्येक मुलासाठी योग्य शिक्षक' हा अहवाल महाराष्ट्र, बिहार, आसाम, छत्तीसगड, कर्नाटक, पंजाब, मिझोराम, तेलंगणा या राज्यांमध्ये केलेल्या सर्वेक्षणांवर आधारित आहे..

हेही वाचा : भारतीय भाषांमध्ये तीन वर्षात अभ्यास साहित्य उपलब्ध करा ; शिक्षण विभागाचे निर्देश

सर्वेक्षणात ४२२ शाळा, ३६१५ शिक्षक, ४२२ मुख्याध्यापक, ६८ शिक्षक शिक्षण संस्था आणि बी.एड.चे शिक्षण घेणाऱ्या १४८१ विद्यार्थी शिक्षकांचा समावेश होता. TISS मधील CETE च्या अध्यक्षा आणि अहवालाच्या प्रमुख लेखक पद्मा एम. सारंगपानी यांनी याविषयी माहिती दिली आहे. अहवालात  UDISE+ 2021-22, नियतकालिक श्रम बल सर्वेक्षण 2021-22 सह प्राथमिक आणि माध्यमिक शाळांमधील डेटा वापरण्यात आला आहे.

सर्व राज्यांमध्ये प्राथमिक वर्गांना शिकवणाऱ्या केवळ 46 टक्के शिक्षकांकडे योग्य व्यावसायिक पात्रता असल्याचे आढळून आले आहे,असे या अहवालात म्हटले आहे. ईशान्येकडील राज्यांमध्ये अजूनही शाळांमध्ये शिक्षक आणि विद्यार्थ्यांना मूलभूत सुविधा पुरविल्या जात नाहीत. खासगी क्षेत्रात सुमारे ४० टक्के शिक्षक असून त्यापैकी ५० टक्के शिक्षक कोणत्याही लेखी कागदपत्रांशिवाय शिकवत आहेत. 
 शारीरिक शिक्षण, संगीत आणि कला या विषयांसाठी शिक्षकांची मोठ्या प्रमाणात कमतरता असल्याचेही या अहवालातून समोर आले आहे. सर्वेक्षणात असे आढळून आले की शिक्षक भरतीमध्ये वेगवेगळ्या विषयांच्या शिक्षकांची गरज आहे, ज्यात ३५ टक्के गणित यानंतर इंग्रजीसाठी ३१ टक्के आणि प्रादेशिक भाषांमध्ये ३० टक्के शिकवण्यासाठी पात्र शिक्षकांची आवश्यकता आहे.