मास कॉपी; कुलगुरूंची परीक्षा केंद्राला भेट, विद्यार्थ्यांवर कारवाई 

एज्युवार्ता न्यूज नेटवर्क 

डॉ. बाबासाहेब आंबेडकर मराठवाडा विद्यापीठाच्या (Dr. Babasaheb Ambedkar Marathwada University) उन्हाळी सत्र परीक्षा (Summer semester exam) सध्या सुरू आहेत. त्या पार्श्वभूमीवर विद्यापीठाचे कुलगुरू डॉ. विजय फुलारी (Vice Chancellor Dr. Vijay Phulari) यांनी मागील काही दिवसांपासून विद्यापीठ आणि संलग्न महाविद्यालयाच्या विविध परीक्षा केंद्रावर अचानक भेटीचे सत्र सुरू केले आहे. दरम्यान फुलंब्री तालुक्यातील पाथरी येथील एक परीक्षा केंद्राला भेट दिली असता तेथील दोन परीक्षा हाॅलमध्ये सामुहिक कॉपी (Mass copying) आढळून आली. त्यानंतर संबंधित विद्यार्थ्यांचा 'संपूर्ण परफॉर्मन्स' रद्द (Students' 'All performance' cancelled) करण्याचे आदेश कुलगुरू फुलारी यांनी प्रशासनाला दिले आहेत. 

मराठवाडा विद्यापीठाच्या पदव्युत्तर अभ्यासक्रमांच्या परीक्षा २९ एप्रिल तर व्यावसायिक अभ्यासक्रमांच्या परीक्षा ६ मे पासून सुरू झाल्या आहेत. कुलगुरू डॉ. फुलारी यांनी पदव्युत्तर परीक्षेत २९ एप्रिल रोजी पहिल्याच दिवशी बीड शहरातील तीन परीक्षा केंद्रांना अचानक भेट दिली. त्या ठिकाणी तब्बल ३६ ठिकाणी ३६ कॉपीबहादर आढळले असून त्यांचा 'संपूर्ण परफॉर्मन्स रद्द' (डब्ल्यूपीसी) करण्याचे आदेश दिले. त्यानंतरही परीक्षा केंद्रावर कुलगुरूंच्या अकस्मात भेटी देण्याचा धडाकाच सुरू आहे. पदव्युत्तर व व्यावसायिक अभ्यासक्रमाच्या तब्बल नऊ परीक्षा केंद्रांना कुलगुरूंच्या पथकाने भेट दिली. त्यावेळी पाथरी येथील राजर्षी शाहू महाविद्यालयातून हे प्रकरण बाहेर आले आहे. 

डॉ. बाबासाहेब आंबेडकर मराठावाडा विद्यापीठाअंतर्गत घेण्यात येणाऱ्या परीक्षांसाठी चार जिल्ह्यांत ३२ परीक्षा केंद्रे आहेत. त्यासाठी ३२ भरारी पथके तयार करण्यात आली आहेत. विद्यापीठाच्या पदव्युत्तर परीक्षा सुरू झाल्यापासून तीन आठवड्यांत सुमारे ५० परीक्षा केंद्रांना कुलगुरूंनी भेट दिली. पदव्युत्तर अभ्यासक्रमांच्या काही परीक्षा केंद्रांवर विद्यापीठाच्या नियमाप्रमाणे बैठक व्यवस्था नव्हती. 
याविषयी कुलगुरू डॉ. फुलारी यांनी संबंधित केंद्रप्रमुखाला विचारणा केली. तसेच पर्यवेक्षकांची खरडपट्टी काढली. या संदर्भात परीक्षा संचालकांना नियमाप्रमाणे कारवाईच्या सूचना कुलगुरूंनी  केल्या. सकाळच्या सत्रात फुलंब्री तालुक्यातील पाथरी येथील राजर्षी शाहू महाविद्यालयाच्या दोन हॉलमध्ये सामूहिक कॉपी आढळून आल्याने येथील सर्व विद्यार्थ्यांचा संपूर्ण परफॉर्मन्स रद्द करण्याचे आदेश कुलगुरूंनी परीक्षा संचालकांना दिले आहेत.