विद्यापीठातील मुलींचे वसतिगृह बनले दारूचा अड्डा; विद्यार्थिनीचा रॅगिंग केल्याचा आरोप

 एज्युवार्ता न्यूज नेटवर्क 

सावित्रीबाई फुले पुणे विद्यापीठातील मुलींच्या वसतिगृहामध्ये दारूच्या बाटल्या आणि सिगारेटची पाकिटे सापडल्याची धक्कादायक माहिती समोर आली आहे. एकीकडे विद्यापीठ अनुदान आयोगाकडून आमली पदार्थविरोधी मोहीम राबविण्याच्या सूचना दिल्या जात असताना विद्यापीठातील मुलींच्या वस्तीगृहात सापडलेल्या दारूच्या बाटल्यांचा खच म्हणजे विद्यापीठाचे वसतिगृह हे दारूचा अड्डा आहे की काय?  असा प्रश्न उपस्थित होतो. त्यामुळे याप्रकरणी दोषी असणाऱ्या विद्यार्थिनींवर आणि हा सर्व प्रकार दडपणाऱ्या विद्यापीठातील अधिकाऱ्यांवर कारवाई करावी, अशी मागणी अखिल भारतीय विद्यार्थी परिषदेतर्फे करण्यात आली आहे.

 विद्यापीठातील वसतिगृहातील विद्यार्थिनी दारू व सिगारेट ओढतात तरीही विद्यापीठकडून कोणतीही कार्यवाही केली जात नाही. ही आश्चर्यकारक बाब आहे. संबंधित विद्यार्थिनीने केलेल्या तक्रारीमध्ये तिच्या रूममध्ये राहणाऱ्या विद्यार्थिनी तिला बळजबरीने दारू पाजत असल्याचा उल्लेख आहे. त्याचप्रमाणे संबंधित विद्यार्थिनीला असभ्य वागणूक देऊन तिला शिव्या दिल्या आहेत. विद्यापीठाला दिलेल्या तक्रारीमध्ये या सर्व बाबी नमूद केल्या आहेत. संबंधित विद्यार्थिनी गेल्या काही महिन्यांपासून हा सर्व त्रास सहन करत आहे. त्यावर विद्यापीठ प्रशासनाकडून कठोर भूमिका घेतली जात नाही. याउलट ज्या दिवशी संबंधित विद्यार्थिनीच्या तक्रारीवर चौकशी समितीची सुनावणी घेतली जाणार होती;त्याच दिवशी माजी महिला वसतिगृह प्रमुख यांना हटवले जाते. हा केवळ योगायोग होता की आणखी काही होते, याची चौकशी होणे गरजेचे आहे.

 विद्यापीठाच्या आधिसभेची बैठक येत्या शनिवारी 22 मार्च रोजी होणार आहे. त्यापूर्वी अशा प्रकारची धक्कादायक माहिती समोर आल्यामुळे विद्यापीठाच्या आधिसभेत या घटनेचे पडसाद निश्चितच उमटलेले पाहायला मिळणार आहेत. त्यामुळे विद्यापीठाला या घटनेमुळे निर्माण झालेल्या सर्व प्रश्नांची उत्तरे द्यावी लागणार आहेत. यापूर्वी सुद्धा विद्यापीठात आमली पदार्थ सापडले होते. त्यावर संबंधित विद्यार्थ्यांवर निलंबनाची कारवाई झाली होती. आता या घटनेत संबंधित पीडित विद्यार्थी ने माझ्यावर रॅगिंग करणाऱ्या विद्यार्थिनींना वाचवण्याचा आणि पाठीशी घालण्याचा प्रयत्न केला असल्याचे विद्यापीठाचे कुलगुरू यांना दिलेल्या निवेदनात नमूद केले आहे. त्यामुळे या सर्व प्रकरणाची सखोल चौकशी होणार का? याबाबतचे चित्र पुढील काही दिवसात स्पष्ट होईल.