प्रथम वर्ष बीबीए, बीसीएच्या परीक्षा महाविद्यालय स्तरावर घेण्याचे निर्देश

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University) संलग्न असणाऱ्या सर्व महाविद्यालय व मान्यता प्राप्त संस्थांनी नव्याने सुरू झालेल्या बीबीए व बीसीए अभ्यासक्रमाच्या परीक्षा महाविद्यालय स्तरावर (BBA and BCA course examinations at college level)घ्याव्यात, असे निर्देश विद्यापीठाच्या परीक्षा विभागातर्फे (Examination Section)देण्यात आले आहेत. प्रात्यक्षिक परीक्षा या येत्या 2 जून ते 7 जून तसेच लेखी परीक्षा 9 जून ते 21 जून या कालावधीत घ्याव्यात, असेही परीक्षा विभागाने प्रसिद्ध केलेल्या परिपत्रक नमूद करण्यात आले आहे.

पुणे विद्यापीठाचे संलग्न असणाऱ्या पुणे, अहिल्यानगर, नाशिक आणि दादरा नगर हवेली या कार्यक्षेत्रातील सर्व संलग्न महाविद्यालय व मान्यता प्राप्त संस्था यांना वेळोवेळी प्रथम वर्षाच्या परीक्षाबाबत सूचित करण्यात आले होते. त्यात बीबीए, बीबीए (आयबी) बीसीए (सीए) बीसीए (सायन्स) बीसीए (कॉमर्स) या अभ्यासक्रमाच्या परीक्षा संबंधित महाविद्यालयांनी घ्याव्यात, असे परिपत्रकात नमूद करण्यात आले आहे.

विद्यापीठाने यापूर्वी 28/10/ 2024, 15/3/ 25 आणि 12/5/2025 या तारखांना परीक्षेच्या संदर्भातील परिपत्रक प्रसिद्ध केले होते. या परिपत्रकांचा आधार घेऊन सर्व महाविद्यालयांच्या प्राचार्यांनी व मान्यता प्राप्त संस्थांच्या संचालकांनी आपल्या स्तरावर परीक्षेचे आयोजन करावे, असे विद्यापीठाच्या परीक्षा व मूल्यमापन मंडळाचे प्रभारी संचालक डॉ.प्रभाकर देसाई यांनी स्पष्ट केले आहे.