भारताचे लष्करप्रमुख जनरल उपेंद्र द्विवेदी 27 नोव्हेंबरला पुण्यात

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University)संरक्षण आणि सामरिक शास्त्र विभागातर्फे(Department of Defense and Strategic Sciences)येत्या 27 नोव्हेंबर रोजी सायंकाळी 5 वाजता विद्यापीठाच्या इरावती कर्वे सामाजिकशास्त्रे संकुलातील नवीन सभागृहात 'जनरल बी.सी.जोशी मेमोरियल व्याख्यान' (General B.C. Joshi Memorial Lecture)आयोजित करण्यात आले आहे. भारताचे लष्करप्रमुख जनरल उपेंद्र द्विवेदी (Army Chief General Upendra Dwivedi) (पीव्हीएसम एव्हीएसएम एडीसी) हे 'भारताच्या विकासात भारतीय सैन्याची भूमिका आणि योगदान' (Role and Contribution of Indian Army in Development of India)या विषयावर व्याख्यान देणार आहेत.

जनरल बी. सी.जोशी यांचा सावित्रिबाई फुले पुणे विद्यापीठाशी (पूर्वीचे पुणे विद्यापीठ) विशेष संबंध होता. विद्यापीठाच्या दीक्षांत समारंभात त्यांनी दीक्षांत भाषण केले होते . तसेच "गेटवे ऑफ नॉलेज" च्या इमारतीच्या पायाभरणीस उपस्थित राहीले होते. त्याचाप्रमाणे कुलगुरूंच्या परिषदेला संबोधित करताना २१ व्या शतकाचे नेतृत्व भारत करेल, असे भाकीत केले होते. त्यांनी "पॉलिसी स्टडीज (धोरणात्मक अभ्यास) मध्ये छत्रपती शिवाजी चेअर" देखील सुरू केले.

कै. जनरल जोशी राष्ट्रीय एकत्रीकरण, मूलभूत मूल्ये आणि भारतीय संस्कृतीची सभ्यता, पर्यावरण संरक्षण, पर्यावरण विकास आणि राष्ट्रीय सुरक्षा निर्णयाचे दृष्टीकोन या विषयांबद्दल संवेदनशील होते. १९९४ मध्ये त्याच्या अकाली निधनानंतर, त्यांच्या विचारांचा आणि दूरदृष्टींचा सन्मान करण्यासाठी, सावित्रीबाई फुले पुणे विद्यापीठातील संरक्षण आणि सामरिक शास्त्र विभाग आणि दक्षिणी कमांडच्या मुख्यालयाने १९९५ मध्ये जनरल बी. सी. जोशी यांच्या नावे वार्षिक व्याख्यानमाला सुरू केली.
यापूर्वी ॲडमिरल करमबीर सिंग, जनरल बिपिन रावत, ॲडमिरल अरुण प्रकाश, जनरल के व्ही. कृष्णा राव आणि इतर अनेक मान्यवरांनी या स्मृती व्याख्यानमालेत व्याख्याने दिली आहेत. २०२२ मध्ये संरक्षण आणि सामरिक शास्त्र विभागाने पूर्वीच्या व्याख्यानाचे प्रमुख धोरणात्मक अंतर्दृष्टी स्पष्ट करणारे राष्ट्रीय सुरक्षेवरील बी. सी. जोशी मेमोरियल व्याख्यानांचे पुस्तक विभागप्रमुख डॉ. विजय खरे यांनी संपादित करुन जनरल बी. सी. जोशी मेमोरियल लेक्चर्स ऑन नॅशनल सिक्युरिटी या नावाने प्रकाशित केले आहे.

या व्याख्यानासाठी विद्यापीठाचे कुलगुरू प्रा. डॉ. सुरेश गोसावी, प्र-कुलगुरू डॉ. पराग काळकर, सन्मानीय अतिथी म्हणून तर संरक्षण आणि सामरिक शास्त्राचे विभाग प्रमुख डॉ विजय खरे हे मुख्य निमंत्रक असतील. यावेळी मोठ्या संख्येने सैन्य, नौदल आणि हवाई दलाचे अधिकारी आणि सावित्रीबाई फुले पुणे विद्यापीठाचे व्यवस्थापन परिषदेचे तसेच अधिसभेचे सदस्यही उपस्थित असतील.