आयआयएम मुंबई सुरू करणार सात नवीन अभ्यासक्रम
देशात लॉजिस्टिक क्षेत्रात येत्या पाच वर्षांत नव्याने एक ते दीड कोटी नोकऱ्या निर्माण होणार आहेत. त्यामुळे या क्षेत्रात कुशल मनुष्यबळाचा पुरवठा व्हावा, या उद्देशाने अभ्यासक्रमाची सुरुवात करण्यात येणार आहे.
eduvarta@gmail.com 
एज्युवार्ता न्यूज नेटवर्क
आयआयएम-मुंबईने (IIM-Mumbai) स्वयंम प्लॅटफॉर्मसाठी नव्याने सात अभ्यासक्रमांचा आराखडा तयार (7 courses planned) केला आहे. त्यांना मान्यता मिळताच, तो देशभरातील विद्यार्थ्यांसाठी स्वयंम प्लॅटफॉर्मवर उपलब्ध करण्याचा आयआयएमचा मानस आहे. देशात लॉजिस्टिक क्षेत्रात (Indian Logistics sector) येत्या पाच वर्षांत नव्याने एक ते दीड कोटी नोकऱ्या निर्माण होणार आहेत. त्यामुळे या क्षेत्रात कुशल मनुष्यबळाचा पुरवठा व्हावा, या उद्देशाने अभ्यासक्रमाची सुरुवात करण्यात येणार आहे.
मुंबईत नव्याने सुरू झालेल्या आयआयएम मुंबईने बदलत्या काळाची गरज ओळखून अभिनव अभ्यासक्रम सुरू करण्यावर भर दिला आहे. त्याचाच भाग म्हणून संस्थेने 'डिजिटल सप्लाय चेन' हा अभ्यासक्रम स्वयंम प्लॅटफॉर्मसाठी यापूर्वीच तयार करून लागू केला आहे. आता संस्थेने नव्याने सात अभ्यासक्रम आराखडे तयार करून ते केंद्रीय उच्चशिक्षण मंत्रालयाकडे पाठविले आहेत.
आयआयएम मुंबई आराखडा तयार केलेल्या अभ्यासक्रमात वेअरहाउस ऑटोमेशन, एआय/एमएल इन पोर्ट मॅनेजमेंट, सप्लाय चेन डिजिटायझेशन, रोल ऑफ ब्लॉक चेन अँड सप्लाय ट्रान्सफॉर्मेशन, ई-कॉमर्स सप्लाय चेन, सायबर सिक्युरिटी इन सप्लाय चेन, डिजिटल इनोव्हेशन अँड टेक्नॉलॉजी इन सप्लाय चेन मॅनेजमेंटचा सहभाग असणार आहे.
