नाशिककरांसाठी खूशखबर; वैद्यकीय महाविद्यालयाला हिरवा कंदील

एज्युवार्ता न्यूज नेटवर्क

नाशिक (Nashik) येथील महाराष्ट्र आरोग्य विज्ञान विद्यापिठाचे (Maharashtra University of Health Sciences) स्वतःचे पदवी व पदव्युत्तर महाविद्यालय व रुग्णालय लवकरच उभे राहणार आहे. त्यासाठी राज्य शासनाने मान्यता दिली आहे. शंभर विद्यार्थी प्रवेश (Admission) क्षमतेचे नवीन महाविद्यालय व त्यास संलग्नित ४३० खाटांचे रुग्णालय उभारले जाणार आहे. (Medical College in Nashik)

नवीन महाविद्यालय व संलग्नित रुग्णालयांच्या विस्तारीकरणांसाठी नाशिकमधील मौजे म्हसरुळ येथील सर्व्हे नं. क्र. २५७ मधील १४ हेक्टर जागा उपलब्ध करुन देण्यात आली असल्याची माहिती बंदरे व खनिकर्म मंत्री व जिल्ह्याचे पालकमंत्री दादाजी भुसे यांनी दिली. याबाबत शासन आदेशही काढण्यात आला आहे.

हेही वाचा : UGC कडून आमदार अमरीश पटेल यांना दणका; विद्यापीठाबाबत मोठा निर्णय

विद्यापिठाची स्वतःची पदवी व पदव्युत्तर संस्था सुरु करण्यासाठी दि. ०५ एप्रिल २०२१ रोजी शासनाने मान्यता दिली होती. तसेच पदवी अभ्यासक्रमासाठीच्या पायाभूत सुविधांच्या आधारावर अत्याधुनिक अतिविशेषोपचार आरोग्य सेवा व संशोधनास चालना देण्यासाठी “महाराष्ट्र पदव्युत्तर वैद्यकीय शिक्षण व संशोधन संस्था स्थापन करण्यास शासन मान्यता देण्यात आली आहे.

शिक्षणविषयक ताज्या बातम्यांसाठी येथे क्लिक करा. http://eduvarta.com/

मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचे मार्गदर्शन आणि वैद्यकीय शिक्षणमंत्री गिरीष महाजन,  महसूल मंत्री राधाकृष्ण विखे पाटील यांच्या सहकार्यामुळे या वैद्यकीय महाविद्यालय व रुग्णालयास मान्यता मिळाली आहे. त्यामुळे नाशिकवासियांच्या आरोग्य सुविधांमध्ये भर पडणार असून उत्तर महाराष्ट्राचे वैद्यकीय महाविद्यालय, पदव्युत्तर वैद्यकीय शिक्षण व संशोधन संस्था यांचे स्वप्न साकार होणार असल्याचे मंत्री भुसे यांनी सांगितले. लवकरच नवीन शासकीय महाविद्यालयाचे भूमिपूजन होणार असल्याची माहिती मंत्री भुसे यांनी दिली.