हृदयद्रावक घटना! दहावी बोर्डाचा पेपर देऊन येताना, आईच्या डोळ्यासमोर विद्यार्थ्याचा गेला जीव

एज्युवार्ता न्यूज नेटवर्क

नागपूर जिल्ह्यात मंगळवारी सायंकाळच्या सुमारास हृदयद्रावक घटना (Heartbreaking incident) समोर आली आहे. सीबीएसई बोर्डाचा इयत्ता दहावीचा पेपर (CBSE 10th Board Paper) देऊन घरी परतत असताना आईच्या डोळ्यादेखत एका विद्यार्थ्याचा भरधाव ट्रकच्या धडकेत (Student dies in accident) जीव गेला आहे.  पिवळी नदी पार्किंग प्लाझासमोर 'हिट अँड रन'ची घटना ('Hit and run' incident) घडली. यामध्ये विद्यार्थ्यांचा जागीच मृत्यू झाला. अथर्व चंद्रशेखर मेश्राम ( वय १६ वर्षे, चंद्रमणीनगर) असे मृत विद्यार्थ्याचे नाव आहे. 

प्राथमिक माहितीनुसार, विद्यार्थी परीक्षा केंद्रावरून पेपर सोडविल्यानंतर आईसोबत दुचाकीने घरी जात होता. अज्ञात ट्रकच्या धडकेत त्याच्या आईसमोरच त्याचा मृत्यू झाला. या घटनेमुळे जनमानसात संताप आहे. शहरात निष्काळजीपणे वाहने चालविणाऱ्यांवर कुठलाही आळा नसून वाहतूक पोlलीस प्रशासनाचा खरोखरच वचक राहिला आहे का? असा सवाल उपस्थित होत आहे.

मृत मुलाची आई रिना मेश्राम (वय ४० वर्षे) या पेपर संपल्यावर दुचाकीवरून त्याला घराकडे घेऊन जात होत्या. पिवळी नदी पार्किंग प्लाझासमोर अज्ञात ट्रक चालकाने भरधाव येत त्यांना धडक दिली. त्यामुळे अथर्व आणि त्याची आई दोघेही खाली पडले. अथर्व गंभीर जखमी झाला. घटनास्थळावरील लोकांनी रिना व अथर्व यांना होप इस्पितळात नेले. तेथे डॉक्टरांनी अथर्वला मृत घोषित केले. या घटनेमुळे रिना यांना मोठा मानसिक धक्का बसला आहे. त्यांचे पती चंद्रशेखर यांच्या तक्रारीवरून अज्ञात ट्रक चालकाविरोधात गुन्हा दाखल करण्यात आला आहे.