शिक्षक बापाने केलेल्या मारहाणीत मुलीचा मृत्यू; खासगी शिकवणीच्या परीक्षेत कमी गुण मिळाल्याचे कारण

एज्युवार्ता न्यूज नेटवर्क 

इयत्ता बारावीच्या खाजगी शिकवणीच्या सराव परीक्षेत मुलीला कमी गुण मिळाल्याने शिक्षक असलेल्या जन्मदात्या बापाने मुलीला बेदम मारहाण केली. त्यात मुलीचा मृत्यू झाला असल्याची धक्कादायक माहिती समोर आली आहे. सांगली जिल्ह्यातील आटपाडी तालुक्यातील नेलकरंजी येथे ही घटना घडली आहे. 

इयत्ता बारावीला पालकांकडून अवास्तव महत्त्व दिले जाते. त्यातून विद्यार्थ्यांवर अपेक्षाचे ओझे टाकले जाते. शिक्षक असलेले धोंडीराम भोसले यांची मुलगी साधना भोसले ही इयत्ता बारावीत शिक्षण घेत होती. साधना अभ्यासात हुशार होती. तिला इयत्ता दहावीमध्ये 92.60 टक्के गुण होते. तसेच तिने शाळेत अव्वल क्रमांक मिळवला होता. बारावीनंतर वैद्यकीय क्षेत्रात करिअर करण्याची तिची इच्छा होती. भोसले यांनी आपल्या मुलीसाठी खाजगी शिकवणी लावली होती. खाजगी शिकवणीत  घेण्यात आलेल्या  सराव परीक्षेत साधनाला कमी गुण मिळाले होते. त्यामुळे चिडून धोंडीराम भोसले यांनी मुलीला बेदम मारहाण केली. या मारहाणीत साधनाचा मृत्यू झाला. पोलिसांनी या प्रकरणी शिक्षक भोसले यांना अटक केली असून साधनाच्या आईवर दुःखाचा डोंगर कोसळला आहे. तसेच त्यांच्यावर पतिविरोधातच पोलिसात फिर्याद देण्याची वेळ आली.

साधनाला कमी गुण मिळाल्याने धोंडीराम भोसले यांनी घरातील दगडी जात्याच्या लाकडी खुंट्याने साधनाला जबर मारहाण केली. साधनाच्या डोक्याला मार बसला होता. तसेच तिच्या शरीराला इजा झाल्या होत्या. साधनाला उपचारासाठी रुग्णालयात दाखल केले असता उपचारादरम्यान तिचा मृत्यू झाला.