पुण्यातून 'क्लस्टर युनिव्हर्सिटी' चा पहिला प्रस्ताव सादर; राज्यात होणार 8 विद्यापीठे
मुंबईतील नगिनदास खंडवाला, शासकीय विज्ञान संस्था, नागपूर , बजाज इन्स्टिट्यूट, वर्धा यांनी क्लस्टर विद्यापीठासाठी राज्य शासनाकडे प्रस्ताव सादर केले आहेत.
eduvarta@gmail.com 
एज्युवार्ता न्यूज नेटवर्क
महाराष्ट्रात नवीन शैक्षणिक धोरणाच्या NEP अंमलबजावणी बरोबरच क्लस्टर विद्यापीठांच्या स्थापनेबाबत (Establishment of cluster universities)शासनाकडून पुढाकार घेतला जात आहे. राज्यात खाजगी विद्यापीठांबरोबरच (Private University)क्लस्टर विद्यापीठे स्थापन होत असून पुण्यातून क्लस्टर विद्यापीठासाठी पहिला प्रस्ताव राज्य शासनाकडे दाखल करण्यात आला आहे. त्यामुळे पुढील काळात पुण्यासह राज्यभरातील शैक्षणिक संस्था क्लस्टर विद्यापीठे स्थापन करण्याबाबत प्रयत्न करतील. परिणामी राज्यात क्लस्टर विद्यापीठांच्या संख्येत वाढ होईल, अशी अपेक्षा राज्याच्या उच्च शिक्षण विभागाकडून (Department of Higher Education) व्यक्त केले जात आहे.
राज्यात खाजगी विद्यापीठांच्या संख्येत झपाट्याने वाढ होत आहे. पुणे व पिंपरी चिंचवड परिसरात अनेक नामांकित शैक्षणिक संस्थांनी खाजगी विद्यापीठ म्हणून शासनाची मान्यता घेतली आहे. त्यात एमआयटी, जी.एच.रायसोनी जेएसपीएम, अलार्ड आदी विद्यापीठांचा समावेश आहे. तसेच राज्यात इतरही जिल्ह्यात खासगी विद्यापीठे सुरू झाली आहेत. त्यातच राज्यात वेगवेगळ्या ठिकाणी क्लस्टर विद्यापीठे स्थापन होत आहेत. होमी भाभा राज्य विद्यापीठ, हैदराबाद सिंध नॅशनल कॉलेजीएट (HSNC) विद्यापीठ, कर्मवीर भाऊराव पाटील विद्यापीठ सातारा आणि वारणा विद्यापीठ, कोल्हापूर ही चार क्लस्टर विद्यापीठे स्थापन झाली आहेत. आता मुंबईतील नगिनदास खंडवाला, शासकीय विज्ञान संस्था, नागपूर , बजाज इन्स्टिट्यूट, वर्धा यांनी क्लस्टर विद्यापीठासाठी राज्य शासनाकडे प्रस्ताव सादर केले आहेत. त्यात पुण्यातून क्लस्टर विद्यापीठाचा पहिला प्रस्ताव महाराष्ट्र एज्युकेशन सोसायटीकडून म्हणजेच गरवारे महाविद्यालयाकडून सादर करण्यात आला आहे. त्यामुळे पुढील काळात गरवारे महाविद्यालयाचे रूपांतर क्लस्टर विद्यापीठात होणार आहे.
राज्य शासनाने शासकीय अनुदानित महाविद्यालयासह विनाअनुदानित महाविद्यालयांना एकत्रित करून क्लस्टर विद्यापीठ स्थापन करण्याची संकल्पना मांडली. याबाबत सर्व शिक्षण संस्था चालकांशी स्वतः उच्च व तंत्र शिक्षण मंत्री चंद्रकांत पाटील यांनी काही महिन्यांपूर्वी संवाद साधला. त्यानंतर आता अनेक नामांकित शैक्षणिक संस्था क्लस्टर विद्यापीठासाठी समोर येत आहेत. शासनाकडे दाखल झालेल्या प्रस्तावानुसार शिक्षण विभागाने संबंधित शिक्षण संस्थांच्या भेटी घेऊन आवश्यक कार्यवाही सुरू केले आहे.मंत्रीमंडळ मंजूरी व अधिवेशनात विधेयक सादर केल्यानंतर या विद्यापीठांना मंजूरी मिळणार आहे.
महाराष्ट्र एज्युकेशन सोसायटीच्या नियमक मंडळाचे अध्यक्ष बाबासाहेब शिंदे म्हणाले, एमईएस गरवारे कॉलेज ऑफ कॉमर्स, आबासाहेब गरवारे महाविद्यालय आणि एमईएस इन्स्टिट्यूट ऑफ मॅनेजमेंट अँड करियर कोर्स अर्थात आयएमसीसी या तीन शैक्षणिक संस्थांचे मिळून क्लस्टर विद्यापीठ स्थापन करण्याचा प्रस्ताव राज्य शासनाकडे सादर केला आहे. राज्य शासनाच्या सर्व नियमांची पूर्तता आणि कायदेशीर प्रक्रिया पूर्ण केल्यानंतरच क्लस्टर विद्यापीठ म्हणून मान्यता मिळणार आहे. परंतु, क्लस्टर विद्यापीठ स्थापनेसाठी तरतूद करण्यात आलेली पाच कोटी रुपये एवढी अनामत रक्कम हा शैक्षणिक संस्थांवर अनावश्यक बोजा आहे. याबाबत शासनाने पुनर्विचार करण्याची आवश्यकता आहे.
