एमफिल धारकांना 'नेट' मधून सूट; यूजीसीने काढल्या पुन्हा त्रुटी
विद्यापीठाने सादर केलेल्या प्रस्तावामध्ये काही त्रुटी असल्याचे आढळून आल्या आहेत. त्यामुळे संबंधित त्रुटींची पूर्तता करून आवश्यक कागदपत्र सादर करावेत, असे निर्देश देण्यात आले आहेत.
eduvarta@gmail.com 
एज्युवार्ता न्यूज नेटवर्क
विद्यापीठ अनुदान आयोग अर्थात यूजीसीने (University Grants Commission-UGC)11 जुलै 2009 पूर्वी एम.फिल.पदवी प्राप्त केलेल्या प्राध्यापकांना नेट परीक्षा उत्तीर्ण होण्यापासून सूट (M.Phil. Exemption for graduated faculty from passing NET examination)देण्याबाबत समिती स्थापन केली आहे. या समितीला सावित्रीबाई फुले पुणे विद्यापीठाने (Savitribai Phule Pune University) सादर केलेल्या 198 प्रस्तावामध्ये त्रुटी आढळून आल्या आहेत. त्यावर आता येत्या दोन दिवसांमध्ये त्रुटी पूर्तता अहवाल (Error fulfillment report) सादर करावा लागणार आहे. त्यासाठी संबंधित उमेदवारांकडून विद्यापीठाने काही कागदपत्रांची मागणी केली आहे, याबाबतचे परिपत्रक 25 डिसेंबर रोजी विद्यापीठाच्या संकेतस्थळावर प्रसिद्ध करण्यात आले आहे.
सावित्रीबाई फुले पुणे विद्यापीठाने 5 सप्टेंबर 2024 रोजी एम फिल धारक प्राध्यापकांचे प्रस्ताव युजीसीकडे सादर केले. त्यावर दोन दिवसांपूर्वी शिक्षण संचालक कार्यालयाकडून विद्यापीठाला पत्र पाठविण्यात आले त्यात विद्यापीठाने सादर केलेल्या प्रस्तावामध्ये काही त्रुटी असल्याचे आढळून आल्या आहेत. त्यामुळे संबंधित त्रुटींची पूर्तता करून आवश्यक कागदपत्र सादर करावेत, असे निर्देश देण्यात आले आहेत. त्यानुसार विद्यापीठाच्या शैक्षणिक विभागाच्या मान्यता कक्षातर्फे नाताळाच्या सुट्टीच्या दिवशी कार्यालय सुरू करून अति तातडीचे पत्र विद्यापीठाच्या संकेतस्थळावर प्रसिद्ध करण्यात आले आहे.
या प्रस्तावांची तज्ञ समितीकडून तपासणी केली असता त्यामध्ये शिक्षक मान्यता पत्र (Teacher Approval), सेवेत कायम केल्याचे पत्र (Confirmation Letter), मूळ निवड समिती अहवालाची प्रत (Selection Committee report), एम. फिल उत्तीर्ण प्रमाणपत्र या त्रूटी आढळून आल्या आहेत. त्यामुळे या त्रूटींची पूर्तता करून येत्या २७ डिसेंबर रोजी सायंकाळी ५:०० वाजेपर्यंत दोन प्रतीमध्ये पुणे शैक्षणिक विभाग (मान्यता कक्ष), अहिल्यानगर उपकेंद्र व नाशिक उपकेंद्र येथे हस्तपोहोच किंवा approval@unipune.ac.in या ई-मेलद्वारे सादर करावेत. तसेच काही अडचण आल्यास ९५२७९४६१४२, ९६३७७७१२०६ या मोबाईल क्रमांकावर संपर्क साधावा. जेणेकरून प्रस्तावावर पुढील योग्य ती कार्यवाही वेळेत करता येईल, असे विद्यापीठाने प्रसिध्द केलेल्या परिपत्रकात नमूद केले आहे.
