आधी आमदार निवड, मग विद्यापीठ परीक्षा; कर्मचाऱ्यांच्या अभावामुळे परीक्षा लांबणीवर

एज्युवार्ता न्यूज नेटवर्क 

महाराष्ट्र विधानसभा निवडणुकींमुळे (Maharashtra Assembly Elections) राजकीय वातावरण तापायला सुरूवात झाली आहे. निवडणूक आयोगाने शासकिय कर्मचाऱ्यांना निवडणुकीचे काम लावले आहे. त्याचा फटका पुण्यश्लोक अहिल्यादेवी होळकर सोलापूर विद्यापीठाला (Punyashlok Ahilya Devi Holkar Solapur University) बसला आहे. कारण विद्यापीठ कर्मचारी निवडणूक कामाला गुंतले असल्याने विद्यापीठाच्या सत्र परीक्षा लांबणीवर (Postponement of Sessional Exams) पडल्या आहेत. पूर्वीच्या वेळापत्रकानुसार ६ नोव्हेंबरपासून सुरू होणाऱ्या परीक्षा आता २७ नोव्हेंबरपासून घेण्यात येणार आहेत. त्यामुळे आधी आमदार निवड, मग विद्यापीठ परीक्षा अशी परिस्थिती सोलापूर विद्यापीठाची पाहायला मिळत आहे.

पुण्यश्लोक अहिल्यादेवी होळकर सोलापूर विद्यापीठाने सत्र परीक्षा पद्धती स्वीकारली आहे. त्यामुळे विद्यापीठाकडून वर्षात दोन वेळा परीक्षा घेतल्या जातात. त्यानुसार ऑक्टोबर/नोव्हेंबर या पहिल्या सत्राच्या परीक्षा ६ नोव्हेंबरपासून सुरू होणार होत्या. याबाबतचे कच्चे वेळापत्रक विद्यापीठाने संकेतस्थळावर प्रसिद्ध केले होते. मात्र, बहुतांश कर्मचारी निवडणूक कामात असल्याने विद्यापीठाने निवडणूका पार पडल्यानंतर परीक्षा घेण्याचा निर्णय घेतला आहे. 

निवडणुका व परीक्षा या एकाच वेळी होत असल्यामुळे कर्मचाऱ्यांना एकाच वेळी दोन्हीकडे जाता येणे शक्य नाही. त्यामुळे विद्यापीठाने परीक्षा पुढे ढकलण्याचा निर्णय घेतला. विद्यापीठाने सत्र परीक्षा पुढे ढकलल्याचे परिपत्रक काढले असून ते सर्व महाविद्यालयांना पाठविले आहे. तसेच पुढे ढकलण्यात आलेल्या परीक्षांचे कच्चे वेळापत्रक संकेतस्थळावर प्रसिद्ध करण्यात येणार आहे. परीक्षा पुढे ढकलल्यामुळे अभ्यास न झालेल्या विद्यार्थ्यांना अधिकचा वेळ मिळाला आहे.