आरटीई शाळा नोंदणीसाठी मुदतवाढ, प्रवेश प्रक्रिया कासव गतीने 

एज्युवार्ता न्यूज नेटवर्क 

शिक्षण हक्क कायद्यांतर्गत (आरटीई) 2025-26 या शैक्षणिक वर्षासाठी शाळांची नोंदणी सुरू झाली असून त्यासाठी संस्थाचालकांची उदासिनता दिसून येत आहे. ३१ डिसेंबर आरटीई पोर्लटवर शाळा नोंदणी करण्याची शेवटची तारीख देण्यात आली होती.आज बुधवार अखेर केवळ 4 हजार 623 शाळांनी नोंदणी केली आहे. हा आकडा लक्षात घेता शिक्षण विभागाने शाळा नोंदणीसाठी ४ जानेवारीपर्यंत मुदतवाढ (School registration deadline extended until January 4) दिली आहे. 

त्यामुळे आत्तापर्यंत नोंद केलेल्या शाळांमध्ये केवळ 59 हजार 955 जागा उपलब्ध आहेत. प्रवेश प्रक्रिया अशीच कासव गतीने पुढे जात असेल तर विद्यार्थ्यांची जूनपर्यंत खरचं प्रवेश निश्चित होईल का? असा प्रश्न उपस्थित होत आहे. शैक्षणिक वर्ष 2024-25 या वर्षात राज्यातील एकूण 9 हजार 138 इंग्रजी माध्यमाच्या शाळांनी नोंदणी केली होती. त्यानुसार 1 लाख 2 हजार 434 जागा उपलब्ध झाल्या होत्या. मागील वर्षाच्या तुलनेत यंदा मात्र हा आकडे निम्यावर आला आहे. त्यामुळे आर्थिक, दुर्बल घटकातील किती विद्यार्थ्यांना आरटीईद्वारे प्रवेश मिळणार हे पाहावे लागणार आहे. 

शिक्षण विभागाने यंदा आरटीई प्रवेश प्रक्रिया वेळेत पूर्ण करण्यासाठी १८ डिसेंबर पासून शाळा नोंदणीला सुरूवात केली. त्यासाठी ३१ डिसेंबर ही अंतिम मुदत देण्यात आली. मात्र, काही शाळांनी याकडे पाठ फिरवल्याचे दिसून येत आहे. त्यामुळे शिक्षण विभागाने नाराजी व्यक्त केली आहे. आरटीई २५ टक्के प्रवेशासाठी शाळा नोंदणी व शाळा व्हेरिफिकेशनचे काम १०० टक्के पूर्ण झाले नाही ही बाब प्रशासकीयदृष्ट्या योग्य नाही.

शाळा नोंदणी व शाळा व्हेरिफिकेशनसाठी ४ जानेवारीपर्यंत मुदतवाढ देण्यात येत आहे. ही अंतिम मुदतवाढ असून दिलेल्या मुदतीत आपल्या अधिनस्त असलेल्या शाळांची नोंदणी व व्हेरिफिकेशन १०० टक्के पूर्ण करुन घ्यावे. अपूर्ण काम राहिल्यास संबंधितावर जबाबदारी निश्चित करून महाराष्ट्र नागरी सेवा (शिस्त व अपिल) १९७९ नुसार शिस्तभंग विषयक कारवाई प्रस्तावित करण्यात येईल, असे प्रसिद्धीपत्रकात म्हटले आहे.