'कुलपति नामनिर्देशित' असाल तरी कामकाजात हस्तक्षेप नको; कुलपति यांचे डाॅ. सानप यांना पत्र

एज्युवार्ता न्यूज नेटवर्क 

डॉ. बाबासाहेब आंबेडकर मराठवाडा विद्यापीठाचे (Dr. Babasaheb Ambedkar Marathwada University) व्यवस्थापन परिषद सदस्य डॉ. गजानन सानप (Dr. Gajanan Sanap) यांना 'कुलपती नामनिर्देशित' (Chancellor Nominee) सदस्य असाल तरी विद्यापीठ अधिकाऱ्यांच्या दैनंदिन कामकाजात हस्तक्षेप करू नका,' असे निर्देश देण्यात आले आहेत. तसे पत्रच डॉ. सानप यांना कुलपती कार्यालयाने पाठवले आहे. 

पुण्यातील युवासेना सह सचिव कल्पेश यादव यांनी काही दिवसांपुर्वी कुलपतींना पत्र लिहीत प्र कुलगुरू डॉ. वाल्मीक सरवदे यांच्या दालनात डॉ. वाघ यांच्यासोबत डॉ. सानप यांनी गैरवर्तन केल्याचे म्हटले होते. हे प्रकरण शैक्षणिक असल्यामुळे कुलपती तथा राज्यपाल यांना हस्तक्षेप करण्याची मागणी यादव यांनी केली होती. त्यानंतर या प्रकरणाची चौकशी करण्यात आली. या प्रकरणाचा चौकशी अहवाल प्राप्त झाल्यानंतर कुलपती कार्यालयाने डाॅ. सानप यांना पत्र पाठवून निर्देश दिले आहेत. 

डॉ.  वाघ यांचीही विद्यापीठ प्रशासनाने चौकशी केली असून, त्यात ते दोषी आढळल्यानंतर त्यांना नोटीस पाठविण्यात आली. त्यानुसार कुलपतींनी १६ जुलै रोजी कुलगुरूंना पत्र पाठवून वस्तुनिष्ठ अहवाल सादर करण्याचे निर्देश दिले. कुलगुरूंनी कुलसचिव डॉ. प्रशांत अमृतकर यांची एकसदस्यीय चौकशी समिती नेमली होती. या समितीचा अहवाल विद्यापीठ प्रशासनाने मागील महिन्यातच कुलपती कार्यालयाला पाठवला होता. 
_________________________

सदरील प्रकरणाचा राज्यपालांना पत्र लिहून पाठपुरावा केला असून कुलपति तथा राज्यपाल कार्यालयाने घेतलेला निर्णय योग्य आहे. कोणीही आपल्या पदाचा गैरवापर करता कामा नये. संविधानाने प्रत्येकाला काही मर्यादित अधिकार दिले आहेत, त्या अधिकाराचा वापर करावा. डाॅ. सानप यांना इतर दैनंदिन कामकाजात केलेल्या हस्तक्षेपामुळे हे निर्देश देण्यात आले आहेत. 

कल्पेश यादव युवासेना सह सचिव