आयसर पुणे येथे ..लेके रहेंगे आजादी.. च्या घोषणा; आयसरचे जेएनयु झाले का ?

एज्युवार्ता न्यूज नेटवर्क 

हमे चाहिए आजादी.., हम लेके रहेंगे आजादी.... या विद्यार्थ्यांनी घोषणा दिल्यामुळे जेएनयु (JNU)चांगलेच चर्चेत आले होते. कारण विद्यार्थ्यांनी देशद्रोही कृत्य केले असून त्यांच्यावर कारवाई करावी, या मंगण्यांनी जोर धरला होता. आता अशाच काहीशा घोषणा पुण्यातील आयसर संस्थेच्या (IISER Pune)आवारात देण्यात आल्या आहेत.त्यामुळे समाज माध्यमांवर जोरदार चर्चा सुरू झाली आहे. तसेच विद्यार्थ्यांनी घोषणा दिलेला व्हिडिओ व्हायरल (video went viral) झाला असून त्यावर आयसर संस्थेने खुलासाही दिला आहे. त्यामुळे जेएनयु, सावित्रीबाई फुले पुणे विद्यापीठानंतर (​​Savitribai Phule Pune University)आता आयसर संस्था चर्चेत आली आहे. 

'आयसर पुणे ' कॅम्पसमधील विद्यार्थ्यांचा व्हायरल झालेला व्हिडिओ एलजीबीटीक्यू समुदायाच्या समर्थनार्थ आयोजित केलेल्या मोर्चाचा आहे.या मोर्चात कोणतेही धार्मिक किंवा देशविरोधी घोषणा नव्हत्या.आझादी हा शब्द एलजीबीटीक्यू समुदायाविरुद्धच्या पूर्वग्रहापासून मुक्ततेच्या संदर्भात वापरला गेला. जागरूकता निर्माण करण्यासाठी आणि समावेशकतेला प्रोत्साहन देण्यासाठी दरवर्षी विद्यार्थ्यांतर्फे शांततापूर्ण कार्यक्रम आयोजित केला जातो.त्याबाबतचा हा व्हिडिओ आहे,असा खुलासा आयसर पुणे तर्फे सोशल मीडियावर देण्यात आला आहे.

राम नावमीच्या निमित्ताने मुद्दाम मोर्चा काढून अशा घोषणा का दिल्या गेल्या,असा प्रश्न शिक्षण क्षेत्रातील काही जाणकार व्यक्तींनी उपस्थित केला आहे. तसेच सतरंगी क्लबच्या सहकार्याने आयोजित या कार्यक्रमात देशद्रोही घोषणा दिल्याचा आरोप केला जात आहे. मात्र,यात कोणतेही तथ्य नसून आयसर प्रशासन देशद्रोही घोषणांसारख्या अशा कोणत्याही गोष्टींचे समर्थन करत नाही. तसेच विद्यार्थ्यांनी दिलेल्या घोषणा या देशविरोधी नव्हत्या, असे आयसर प्रशासनातील अधिकाऱ्यांनी 'एज्युवार्ता'शी बोलतांना सांगितले.