पॅट इयत्ता नववी मराठी विषयाची प्रश्नपत्रिका फुटली; व्हिडिओ व्हायरल 

एज्युवार्ता न्यूज नेटवर्क 

महाराष्ट्र राज्य शैक्षणिक संशोधन व प्रशिक्षण परिषदेच्या (Maharashtra State Council of Educational Research and Training)माध्यमातून घेतल्या जाणाऱ्या पायाभूत चाचणी परीक्षा क्रमांक दोन (Test Exam Number Two) या पॅट परीक्षेची इयत्ता नववीची प्रश्नपत्रिका फुटली असून प्रश्नपत्रिका कशी सोडवावी या संदर्भातील व्हिडिओ चांगलाच व्हायरल झाला आहे. त्यामुळे कोट्यावधी रुपये खर्च करून शिक्षण विभागाकडून पॅट परीक्षा (PAT exam from the Department of Education)का आणि कशासाठी घेतली जाते, असा प्रश्न पुन्हा एकदा उपस्थित होत आहे. शिक्षण विभागाकडून याबाबतची चौकशी करून कारवाई केली जाणार का ? असा सवाल विचारला जात आहे. 

राज्यातील सर्व शाळांमधील इयत्ता पहिली ते इयत्ता नववीच्या विद्यार्थ्यांच्या वार्षिक परीक्षा व पेठ परीक्षा महाराष्ट्र राज्य शैक्षणिक संशोधन व प्रशिक्षण परिषदेने प्रसिद्ध केलेल्या वेळापत्रकानुसार घेतल्या जाव्यात,असे आदेश निर्गमित करण्यात आले. त्यावर शिक्षण विभागात बरीच उलट सुलट चर्चा झाली. मुख्याध्यापक संघाने बॅट परीक्षा शिक्षण विभागाने दिलेल्या वेळापत्रकानुसार घेतल्या जातील मात्र वार्षिक परीक्षा मुख्याध्यापक संघाने प्रसिद्ध केलेल्या वेळापत्रकानुसार होतील असे पत्रक प्रसिद्ध केले.SCERT च्या STARS प्रकल्प अंतर्गत 'संकलित मूल्यमापन दोन' 2024 -2025 इयत्ता नववीची मराठी प्रथम भाषा ही परीक्षा येत्या मंगळवारी 8 एप्रिल रोजी घेतली जाणार आहे.

Tutor ADM या यूट्यूब चॅनलवर इयत्ता नववीची मराठी विषयाची पॅट ची प्रश्नपत्रिका कशी सोडावी, या संदर्भातील व्हिडिओ उपलब्ध आहे. दोन दिवसांपूर्वीच हा व्हिडिओ प्रसिद्ध करण्यात आला असून त्यावर स्पष्टपणे पायाभूत चाचणी क्रमांक 2- 2025 असा उल्लेख आहे. मराठी विषयाच्या प्रत्येक प्रश्नाचे उत्तर काय आहे या प्रश्नाचे उत्तर कसे लिहावे, अशी सर्व माहिती या व्हिडिओमध्ये देण्यात आली आहे. त्यामुळे परीक्षेची कोणतीही गोपनीयता राखले गेले नसल्याचे दिसून येत आहे. मात्र याबाबत सत्यता पडताळून घेण्यासाठी महाराष्ट्र राज्य शैक्षणिक संशोधन व प्रशिक्षण परिषदेचे संचालक राहुल रेखावार यांना संपर्क साधला असता संपर्क होऊ शकला नाही.

---------------------------------------------------------------------------

पॅट परीक्षेबाबत हवी तेवढी गोपनीयता पाळली जात नाही. या पूर्वी सुध्दा पॅटच्या प्रश्नपत्रिका रस्त्यावर सापडल्या होत्या. महाराष्ट्र राज्य शैक्षणिक संशोधन व प्रशिक्षण परिषदेकडून वर्तमानपात्राचे गठ्ठे जसे वितरणाला पाठवतात,तशा पध्दतीने पॅटच्या प्रश्नपत्रिका सर्व शाळांना पाठवल्या जातात.त्यामुळे त्या फुटाण्याची शक्यता अधिक असते. इयत्ता नववी मराठी विषयाची प्रश्नपत्रिका फुटली आहे.त्यामुळे आता विद्यार्थ्यांचे योग्य मूल्यांकन कसे करणार? असा प्रश्न निर्माण होतो. 

- महेंद्र गणपुले, माजी उपाध्यक्ष, मुख्याध्यापक संघ 

पॅट परीक्षेची प्रश्नपत्रिका या लिंकवर सोडवण्यात आली आहे. 

https://www.youtube.com/watch?v=BLREKP_qORw