मोठी बातमी: TAIT परीक्षेच्या तारखांमध्ये बदल; आता या तारखेला होणार परीक्षा 

एज्युवार्ता न्यूज नेटवर्क 

महाराष्ट्र राज्य परीक्षा परिषदेच्या (Maharashtra State Examination Council)माध्यमातून घेतल्या जाणाऱ्या शिक्षक अभियोग्यता व बुद्धिमत्ता चाचणी अर्थात TAIT परीक्षेचे आयोजन 24 मे ते 5 जून या कालावधीत करण्यात आले होते. परंतु, राज्य परीक्षा परिषदेने परीक्षेच्या नियोजनात बदल केला आहे.आता या परीक्षा 27 मे ते 30 मे आणि 2 जून ते 5 जून या कालावधीत घेतल्या जाणार आहेत.त्यामुळे परीक्षेच्या वेळापत्रकात बदल (Changes in exam schedule)करण्यात आला आहे. 

परीक्षा परिषदेच्या माध्यमातून घेतल्या जाणाऱ्या TAIT परीक्षेसाठी राज्यभरातून सुमारे 2 लाख 36 हजार उमेदवारांनी अर्ज केले आहेत. या उमेदवारांची परीक्षा केव्हा घेतली जाणार याबद्दलची माहिती परीक्षा परिषदेने पूर्वीच प्रसिद्धी पत्रकाद्वारे स्पष्ट केली होती. राज्यातील विविध परीक्षा केंद्रांवरील भौतिक सुविधा विचारात घेऊन 24 मे ते 5 जून या कालावधीत उमेदवारांच्या परीक्षा घेतल्या जाणार होत्या. परंतु, परीक्षा परिषदेने परीक्षेच्या वेळापत्रकामध्ये बदल केला आहे. तसेच परीक्षेचे हॉल तिकीट लवकरच उमेदवारांना उपलब्ध करून दिले जाणार आहे. उमेदवारांनी परीक्षा परिषदेने वेळोवेळी दिलेल्या आणि प्रवेश पत्रात नमूद केलेल्या त्याचप्रमाणे www.mscepune.in या संकेतस्थळावर वेळोवेळी प्रसिद्ध केलेल्या माहिती पुस्तिकेतील सूचनांचे काटेकोरपणे पालन करावे, असे आवाहन परीक्षा परिषदेच्या आयुक्त अनुराधा ओक यांनी केले आहे.