रानडे इन्स्टिट्यूटमधील प्रवेशासाठी ऑफलाईन प्रवेश परीक्षा; २७ मेपर्यंत अर्ज करण्यास मुदत
एक वर्ष कालावधी असणाऱ्या या अभ्यासक्रमांसाठी इच्छुक विद्यार्थ्यांना दोन्ही अभ्यासक्रमांच्या सामायिक प्रवेश परीक्षांचे ऑनलाईन अर्ज येत्या २७ मेपर्यंत सादर करता येतील.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या(Savitribai Phule Pune University) संज्ञापन व वृत्तपत्रविद्या विभागामध्ये (Department of Communication and Journalism)चालणाऱ्या पत्रकारिता प्रगत अभ्यासक्रमांसाठी येत्या ३१ मे रोजी ऑफलाईन प्रवेश परीक्षा घेण्यात येणार आहेत. इच्छुक विद्यार्थी त्यासाठी येत्या २७ मे अखेरपर्यंत आपले ऑनलाईन प्रवेश परीक्षा अर्ज (Online Entrance Test Application)सादर करू शकतील.
रानडे इन्स्टिट्यूटच्या (Ranade Institute)आवारामध्ये चालणाऱ्या या विभागामार्फत सकाळी पत्रकारिता प्रगत अभ्यासक्रम (ॲडव्हान्स कोर्स इन जर्नलिझम) व सायंकाळी डिजिटल मीडिया प्रगत अभ्यासक्रम (ॲडव्हान्स कोर्स इन डिजिटल मीडिया) हे दोन अभ्यासक्रम चालविले जातात. एक वर्ष कालावधी असणाऱ्या या अभ्यासक्रमांसाठी इच्छुक विद्यार्थ्यांना येत्या २७ मेपर्यंत दोन्ही अभ्यासक्रमांच्या सामायिक प्रवेशपरीक्षांचे ऑनलाईन अर्ज सादर करता येतील.
विभागामार्फत ३१ मे रोजी ऑफलाईन स्वरुपात लेखी परीक्षा घेण्यात येणार असून, त्या आधारे अभ्यासक्रमांसाठी विद्यार्थ्यांची निवड केली जाईल. पत्रकारिता प्रगत अभ्यासक्रमासाठी सकाळी १० ते दुपारी १ वाजेपर्यंत तर डिजिटल मीडिया प्रगत अभ्यासक्रमासाठी दुपारी २ ते ५ या वेळेत लेखी प्रवेश परीक्षा घेण्यात येणार आहे. या अभ्यासक्रमांमधून विद्यार्थ्यांना माध्यमांच्या क्षेत्रांविषयी अत्यंत दर्जेदार शिक्षण-प्रशिक्षण मिळवणे शक्य होते. विद्यापीठाच्या विभागामार्फत चालणाऱ्या अशा अभ्यासक्रमांचा जास्तीत जास्त विद्यार्थ्यांनी लाभ घेण्याचे आवाहन विभागप्रमुख डॉ. संजय तांबट यांनी केले आहे.
