बार्टी, सारथी, महाज्योतीने मागवले विद्यार्थ्यांकडून सहामाही अहवाल
तिन्ही संस्थांकडून विद्यार्थ्यांना सहामाही अहवाल सादर करण्यासाठी अनेक जाचक अटी घालण्यात आल्या आहेत. यामध्ये उपस्थिती सादर करण्यास सांगण्यात आली आहे. मात्र, संशोधन विद्यार्थी संशोधनासाठी बाहेर असतात त्यामुळे त्यांची उपस्थिती लागत नाही. अशाप्रकारे अहवाल सादर करण्यासाठी विद्यार्थ्यांना अडचणी येत आहेत.
eduvarta@gmail.com 
एज्युवार्ता न्यूज नेटवर्क
छत्रपती शाहू महाराज संशोधन, प्रशिक्षण व मानव विकास संस्था 'सारथी'सह 'डॉ. बाबासाहेब आंबेडकर संशोधन आणि प्रशिक्षण संस्था' (बार्टी) आणि 'महात्मा ज्योतिबा फुले संशोधन व प्रशिक्षण संस्था' (महाज्योती) हा संस्थांकडून संशोधक विद्यार्थ्यांना (Sarathi, Barti, Mahajyoti Fellowship Student) १५ जानेवारीपर्यंत सहामाही अहवाल (Half-yearly report) सादर करण्याचे आवाहन करण्यात आले आहे. मात्र, यामध्ये घालण्यात आलेल्या जाचक अटींमुळे विद्यार्थी त्रस्त आहेत.
तिन्ही संस्थांकडून विद्यार्थ्यांना सहामाही अहवाल सादर करण्यासाठी अनेक जाचक अटी घालण्यात आल्या आहेत. यामध्ये उपस्थिती सादर करण्यास सांगण्यात आली आहे. मात्र, संशोधन विद्यार्थी संशोधनासाठी बाहेर असतात त्यामुळे त्यांची उपस्थिती लागत नाही. अशाप्रकारे अहवाल सादर करण्यासाठी विद्यार्थ्यांना अडचणी येत आहेत. यामुळे ६० ते ७० टक्के विद्यार्थी वंचित राहण्याची शक्यता वर्तवण्यात येत आहे. ही बाब लक्षात घेऊन ६ जानेवारीला बार्टी संस्थेच्या कार्यालयासमोर अटी मागे घेण्यात याव्यात यासाठी आंदोलन करण्यात येणार असल्याची माहिती विद्यार्थ्यांनी दिली आहे.
काही दिवसांपुर्वी सरसकट १०० टक्के पाठ्यवृत्ती मंजूर करावी असा आदेश तात्कालिक मुख्यमंत्री एकनाथ शिंदे यांनी दिला होता. मात्र तीन महिन्यांचा कालावधी लोटल्यानंतरही विद्यार्थ्यांच्या बँक खात्यात पैसे वर्ग झालेले नाहीत. या पार्श्वभूमीवर 'सारथी'च्या ९६९, 'बार्टी'च्या ८६१, तर 'महाज्योती'च्या ८६९ अशा एकूण दोन हजार ६९९ विद्यार्थ्यांच्या संशोधनाचे काम प्रलंबित आहे. पाठ्यवृत्ती मिळविण्यासाठी विद्यार्थी गेल्या दोन वर्षांपासून आंदोलनाद्वारे संघर्ष करीत आहेत. या संघर्षाला अर्धेच यश आले आहे. विद्यार्थ्यांना हक्काची रक्कम लवकर मिळाल्यास संशोधनाच्या कामाला गती येईल, अशी प्रतिक्रिया विद्यार्थ्यांनी व्यक्त केली.
________________________________________
नियमित संशोधन करणाऱ्या विद्यार्थ्यांना संशोधक संस्थांना सहामाही अहवाल सादर करावे लागतात. मात्र, प्रशासनाकडून या प्रक्रियेला दिरंगाई झाल्यामुळे मागील अहवाल महाविद्यालय किंवा विद्यापीठ देण्यात तयार नाहीत. शिक्षण संस्था सांगत आहेत की, यामुळे आम्ही अडचणीत येऊ तुम्हाला मागील अहवाल कसा देता येईल. मात्र, तिन्ही संशोधन संस्थांचे म्हणणे आहे की, मागील अहवाल सादर केला जाणार नाही तोपर्यंत तुमचे पैसे जमा होणार नाहीत. त्यामुळे निधी मंजूर असून देखील काही विद्यार्थी फेलोशीप पासून वंचित राहणार आहेत.
पल्लवी गायकवाड, पी. एचडी संशोधक विद्यार्थिनी बार्टी
