बाप कंपनीला वारे गुरुजींची साथ; धनगरवाडीची शाळा घेतली दत्तक
केवळ शासकीय मदतीच्या आधारेच नाही तर लोकसहभागातून शाळा उभी करण्याचे काम वारे गुरुजी यांच्या माध्यमातून केले जाणार आहे. त्यासाठी लोकसहभागातून बाप कंपनीकडून व सीएसआर मधून निधी उभा केला जाणार आहे.
eduvarta@gmail.com 
एज्युवार्ता न्यूज नेटवर्क
पुणे जिल्ह्यातील वाबळेवाडीनंतर जालिंदर नगरची (Wablewadi, Jalandhar Nagar)जिल्हा परिषदेची शाळा जागतिक पातळीवर पोहोचवणाऱ्या दत्तात्रय वारे गुरुजी (Dattatreya Vare Guruji)यांनी आता संगमनेर येथील धनगरवाडीची जिल्हा परिषदेची शाळा (Dhangarwadi Zilla Parishad School)दत्तक घेऊन तिचा कायापालट करण्याचे काम हाती घेतले आहे. यात ग्रामीण भागातील सुप्रसिद्ध 'बाप' या आयटी कंपनीने वारे गुरुजी यांच्या मदतीने या परिसरातील शाळांची गुणवत्ता वाढवण्याच्या दृष्टीने बदल करण्यासाठी उपाययोजना सुरू केल्या आहेत.
संगमनेर मधील बाप कंपनीचे संस्थापक रावसाहेब घुगे यांनी जागतिक क्रमवारीत पहिल्या क्रमांकावर आलेल्या जालिंदर नगर येथील जिल्हा परिषदेच्या शाळेला भेट दिली. शाळेतील बदललेली परिस्थिती पाहून त्यांनी दत्तात्रय वारे गुरुजी यांना संगमनेर परिसरातील जिल्हा परिषदेच्या शाळांमध्ये सुद्धा सुधारणा करण्यासाठी मदतीचा हात मागितला. वारे गुरुजी यांनी त्यास तात्काळ होकार देत संगमनेर मधील धनगरवाडी येथील शाळेचे रूपडे बदलण्याच्या दृष्टीने गावातील नागरिकांची भेट घेतली.केवळ शासकीय मदतीच्या आधारेच नाही तर लोकसहभागातून शाळा उभी करण्याचे काम वारे गुरुजी यांच्या माध्यमातून केले जाणार आहे. त्यासाठी लोकसहभागातून बाप कंपनीकडून व सीएसआर मधून निधी उभा केला जाणार आहे.
बाप कंपनीने लहान मुलांसाठी 'फ्युचर एक्स' हे नवीन प्रॉडक्ट तयार केले आहे. या प्रॉडक्टच्या माध्यमातून विद्यार्थ्यांना शालेय जीवनापासूनच AI चे मार्गदर्शन केले जाणार आहे. विद्यार्थ्यांना त्यात सायबर सिक्युरिटी आणि आर्थिक साक्षरता याबाबतचे प्रशिक्षण मिणार आहे. शिक्षण पूर्ण झाल्यानंतर वेगवेगळ्या ठिकाणी खाजगी क्लासेस लावून तंत्रज्ञान, सायबर सिक्युरिटी व आर्थिक साक्षरतेबाबत पैसे देऊन त्याचे प्रशिक्षण घ्यावे लागते. परंतु, विद्यार्थ्यांना शालेय जीवनातच या पद्धतीचे शिक्षण दिल्यास नवी पिढी अधिक सक्षम होईल. त्यामुळे शालेय जीवनापासूनच विद्यार्थ्यांना नवनवीन गोष्टी शिकवण्याच्या दृष्टीने बाप कंपनी व वारे गुरुजी यांनी धनगरवाडीच्या शाळेत एकत्रित काम करण्यास सुरुवात केली आहे.
धनगरवाडीसह परिसरातील 16 गावांमधील विकासासाठी बाप कंपनीने पुढाकार घेतला आहे.धनगरवाडीची शाळा अंतरराष्ट्रीय दर्जाची करण्याचा मानस बाप कंपनीचे संस्थापक रावसाहेब घुगे यांनी बोलून दाखवला.
दत्तात्रय वारे गुरूजी यांनी शाळेच्या शैक्षणिक गुणवत्तावाढीसाठी लागणारी आवश्यक मदत करण्यास होकार दिला आहे.त्यामुळे पुढील काळात महाराष्ट्रात जिल्हा परिषदेच्या शाळांची गुणवत्ता अधिकाधिक वाढेल,अशी अपेक्षा आहे.
