महाराष्ट्र लोकसेवा आयोगाच्या सह सचिव पदी सरिता बांदेकर-देशमुख यांची नियुक्ती

एज्युवार्ता न्यूज नेटवर्क 

मंत्रालयाच्या सामान्य प्रशासन विभागात (General Administration Department) सह सचिव म्हणून कार्यरत असणाऱ्या सरिता बांदेकर-देशमुख (Sarita Bandekar-Deshmukh) यांची महाराष्ट्र लोकसेवा आयोगाच्या सह सचिव (MPSC Joint Secretary) या पदावर तीन वर्षाच्या कालावधीसाठी नियुक्ती (Appointment for a period of 3 years) करण्यात आली आहे. त्यांची ही नियुक्ती आयोगाच्या काही अटी व शर्तींच्या आधारावर करण्यात आली आहे. 

सरिता बांदेकर-देशमुख ज्या तारखेला प्रतिनियुक्तीच्या पदावर रूजू होतील त्या तारखेपासून प्रतिनियुक्तीच्या सेवेचा प्रारंभ होईल. त्या ज्या तारखेला आपल्या शासकीय पदाचा कार्यभार पुन्हा स्वीकारतील, त्या तारखेला त्यांची सेवा समाप्त होईल. जर त्यांची सेवा लोकसेवेच्या हिताच्या दृष्टीने शासनाला आवश्यक वाटली तर प्रतिनियुक्तीचा कालावधी संपण्यापूर्वी कोणत्याही वेळी त्यांना परत बोलावून घेण्याचा अधिकार शासन / सक्षम प्राधिकाऱ्यास राहील.

जर त्यांची सेवा स्वीयेत्तर नियोक्त्याला आवश्यक वाटली नाही, तर त्यांना मूळ विभागाकडे परत पाठविण्याची मुभा स्वीयेत्तर नियोक्त्याला राहील. मात्र याप्रमाणे परत पाठविण्यापूर्वी स्वीयेत्तर नियोक्त्याने शासनाला / सक्षम प्राधिकाऱ्याला तीन महिन्यांची नोटीस दिली पाहिजे; आणि त्यांनी मूळ विभागाकडे परत जाण्याचा आपला उद्देश आहे, अशी कमीत कमी तीन महिन्यांची लेखी नोटीस शासनाला / सक्षम प्राधिकाऱ्याला दिल्यानंतर त्यांना मूळ विभागाकडे परत येण्याची मुभा राहील, असे नियुक्ती पत्रात नमूद करण्यात आले आहे.