MPSC : संयुक्त गट क मुख्य परीक्षेसाठी अर्ज प्रक्रिया सुरू, २१ सप्टेंबर रोजी परीक्षा

एज्युवार्ता न्यूज नेटवर्क

महाराष्ट्र लोकसेवा आयोगामार्फत (Maharashtra Public Service Commission) राज्य शासनाच्या सेवेतील गट -क संवर्गातील १ हजार ६१८ रिक्त पदे (1 thousand 618 vacant posts in Group-C) भरण्यासाठी ९ ऑक्टोबर २०२४ रोजी जाहिरात प्रसिद्ध करण्यात आली होती. त्यानंतर १ जून २०२५ रोजी परीक्षा घेण्यात आली. या संयुक्त पूर्व परीक्षेचा निकाल (Joint Preliminary Examination Result) नुकताच ६ ऑगस्ट रोजी प्रसिद्ध करण्यात आला. त्यानंतर आता ८ ऑगस्टपासून संयुक्त मुख्य परीक्षेसाठी अर्ज प्रक्रिया सुरू करण्यात आली आहे. त्यासाठी २१ सप्टेंबर रोजी परीक्षा घेण्यात येणार आहे. अर्ज करण्याची अंतिम मुदत २२ ऑगस्टपर्यंत देण्यात आली आहे. 

CET Cell : बीबीए, बीसीए निकाल जाहीर, गुणपत्रिका संकेतस्थळावर

सदर संयुक्त पूर्व परीक्षेचा निकाल ६ ऑगस्ट, २०२५ रोजी जाहीर करण्यात आला असून निकालाआधारे मुख्य परीक्षेच्या प्रवेशासाठी पात्र ठरलेल्या उमेदवारांकरीता मुख्य परीक्षा रविवार,२१ सप्टेंबर, २०२५ रोजी अमरावती, छत्रपती संभाजी नगर, नागपूर, नाशिक, नवी मुंबई व पुणे जिल्हा केंद्रांवर आयोजित करण्यात येईल, असे आयोगाकडून प्रसिद्ध करण्यात आले आहे.

आर्थिकदृष्टया दुर्बल घटकांतील (ईडब्लूएस) उमेदवारांकरीता शासन निर्णय १२ फेब्रुवारी, २०१९ व दिनांक ३१ मे, २०२१ आणि तदनंतर शासनाने यासंदर्भात वेळोवेळी निर्गमित केलेल्या आदेशानुसार कार्यवाही करण्यात येईल. तसेच आर्थिकदृष्टया दुर्बल घटकाचा दावा केलेल्या उमेदवारांनी सन २०२४-२०२५ या आर्थिक वर्षाचे प्रमाणपत्र, कागदपत्र पडताळणीच्या वेळी सादर करणे आवश्यक राहील, असे आयोगाकडून सांगण्यात आले आहे.

सदर जाहिरात सामाजिक आणि शैक्षणिकदृष्ट्या मागासवर्ग अधिनियम दिनांक २६ फेब्रुवारी २०२४ व संबंधित शासन निर्णय दिनांक २७ फेब्रुवारी, २०२४ संदर्भात मा. उच्च न्यायालयात दाखल झालेल्या न्यायिक प्रकरणातील अंतिम न्यायनिर्णयाच्या अधीन राहून प्रसिद्ध करण्यात येत आहे. या जाहिराती संबंधित शिफारशी व नियुक्त्या उल्लेखित न्यायिक प्रकरणाच्या अधीन राहून करण्यात येतील. त्या अनुषंगाने आयोगामार्फत २६ एप्रिल, २०२४ रोजी प्रसिद्ध करण्यात आलेले प्रसिद्धीपत्रक जाहीरातीस लागू राहील, असे देखील म्हटले आहे.