मुरुड-जंजिरा सहल दुर्घटनेप्रकरणी 9 वर्षानंतर कारवाई; अबेदा इनामदार कॉलेजला 10 लाखांचा दंड 

एज्युवार्ता न्यूज नेटवर्क 

महाराष्ट्र कॉस्मोपॉलीटन एज्युकेशन सोसायटी संचालित पुणे कॅम्प परिसरातील अबेदा इनामदार महाविद्यालयातील (abeda inamdar college)तब्बल 14 विद्यार्थी मुरुड जंजिरा (murud janjira) येथे सहलीला गेलेले असतात फेब्रुवारी 2016 मध्ये समुद्रात बुडून मरण पावले होते. या प्रकरणी सावित्रीबाई फुले पुणे विद्यापीठाने (Savitribai Phule Pune University)समिती स्थापन करून संबंधित महाविद्यालयावर कारवाई करण्याचे निर्देश दिले होते. तब्बल 9 वर्षांनंतर विद्यापीठ प्रशासनाला जाग आली असून विद्यापीठाच्या व्यवस्थापन परिषदेच्या बैठकीत या महाविद्यालयाला दहा लाख रुपयांचा दंड ठोठवण्याचा निर्णय घेण्यात आला आहे, असे विद्यापीठाच्या व्यवस्थापन परिषद सदस्यांनी सांगितले.

अबेदा इनामदार महाविद्यालयातील अनेक विद्यार्थी 2016 मध्ये मुरुड जंजिरा येथे सहलीसाठी गेले होते. समुद्राच्या पाण्याच्या खोलीचा आणि भरती ओहोटीचा अंदाज न आल्यामुळे या सहली दरम्यान तब्बल 14 विद्यार्थ्यांचा पाण्यात बुडून मृत्यू झाला होता.त्यामुळे मृत पावलेल्या विद्यार्थ्यांच्या पालकांवर दुःखाचा डोंगर कोसळला होता. आजही मृत पावलेल्या विद्यार्थ्यांच्या पालकांनी महाविद्यालयावर आणि सहलीसाठी गेलेल्या संबंधित प्राध्यापकांवर आणि प्राचार्यांवर कारवाई करावी, अशी मागणी लावून धरली आहे. दोषींवर कारवाई  व्हावी आणि आपल्या मुलांना न्याय मिळावा, अशी भूमिका घेत पालकांनी विद्यापीठ प्रशासनाकडे पत्रव्यवहार सुरू ठेवला होता.

सावित्रीबाई फुले पुणे विद्यापीठाच्या विविध अधिकार मंडळांमध्ये याप्रकरणी चर्चा करण्यात आली. तसेच संबंधित महाविद्यालयाकडून लेखी खुलासा मागविण्यात आला. विद्यापीठाने संबंधित महाविद्यालयाला दोषी ठरवून प्रत्येक विद्यार्थ्यामागे 3 लाख रुपये एवढा दंड केला. परंतु ,या कारवाई विरुद्ध महाविद्यालयाने 2019 मध्ये राष्ट्रीय आयोग, अल्पसंख्यांक शैक्षणिक संस्था, नवी दिल्ली येथे अपिल दाखल केले. मात्र, आयोगाने याबाबत कोणताही निर्णय दिला नाही किंवा कोणतीही कारवाई करू नये, असे कोणतेही निर्देश दिले नाहीत अथवा कारवाईला स्थगिती दिली नाही, तरीही विद्यापीठ प्रशासनाने संबंधित महाविद्यालयावर कारवाई केली नाही, याबाबतचा पत्रव्यवहार मृत विद्यार्थ्यांच्या पालकांनी विद्यापीठाकडे पुन्हा केला होता. 

विद्यापीठ प्रशासनाने विद्यापीठाच्या व्यवस्थापन परिषदेतील तीन सदस्यांची यासंदर्भात कारवाई करण्यासाठी समिती स्थापन केली होती. समितीने दिलेल्या अहवालानुसार अबेदा इनामदार महाविद्यालयाला दहा लाख रुपयांचा दंड ठोठावण्याचा निर्णय गुरुवारी झालेल्या विद्यापीठाच्या व्यवस्थापन परिषदेच्या बैठकीत घेण्यात आला, असे व्यवस्थापन परिषदेच्या सदस्यांनी सांगितले. त्यामुळे नऊ वर्षानंतर का होईना ? मुरुड जंजिरा सहल दुर्घटनेत मृत पावलेल्या विद्यार्थ्यांना न्याय देण्याचे धाडस विद्यापीठाच्या व्यवस्थापन परिषदेच्या सदस्यांनी दाखवले, याबाबत मृत पावलेल्या विद्यार्थ्यांच्या पालकांकडून काहीसे समाधान व्यक्त केले जात आहे.

---------------

मुरुड जंजिरा सहल दुर्घटनेस दोषी असणाऱ्या संबंधित शिक्षक व महाविद्यालय प्रशासनावर कारवाई करावी, यासाठी गेल्या नऊ वर्षांपासून आम्ही पालक प्रयत्न करत आहोत. काही दिवसांपूर्वी विद्यापीठ प्रशासनाकडे अबेदा इनामादार महाविद्यालयावर कारवाई करावी, या मागणीचे निवेदन दिले होते. येत्या फेब्रुवारी  महिन्यात या दुर्घटनेला नऊ वर्ष पूर्ण होत आहेत.

- शिवाजी सलगर, मुरुड जंजिरा सहल दुर्घटनेतील मृत विद्यार्थी पालक

------------------------------------------------

मुरुड जंजिरा येथे सहलीसाठी गेलेल्या अबेदा इनामदार महाविद्यालयातील विद्यार्थ्यांचा दूर्दैवी मृत्यू झाला होता.त्यावर कार्यवाही करण्यासाठी स्थापन केलेल्या समितीच्या अहवालावर विद्यापीठाच्या व्यवस्थापन परिषदेत चर्चा करण्यात आली.विद्यापीठाने संबंधित महाविद्यालयाला 10 लाख रुपयांचा दंड केला आहे.विद्यापीठाने घेतलेल्या कार्यवाहीच्या निर्णयाची पूर्तता होणे आवश्यक आहे. अन्यथा नाईलाजास्तव विद्यापीठाला पुढील कार्यवाही करावी लागेल.

डॉ. देविदास वायदंडे, व्यवस्थापन परिषद सदस्य, सावित्रीबाई फुले पुणे विद्यापीठ, पुणे