मराठी विषय बंद पाडणाऱ्या कॉलेजचे अकॅडमिक ऑडिट;महिन्याभरात तपासणी 

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी संलग्न (Affiliated to Savitribai Phule Pune University) कस्तूरी शिक्षण संस्थेच्या महाविद्यालयाने(Colleges of Kasturi Education Institute) विद्यार्थ्यांना मराठी विषय (Marathi subject)घेण्यापासून रोखले होते.त्यामुळे विद्यापीठाने चौकशी समिती स्थापना केली.तसेच विद्यापीठाच्या अधिसभेतही प्रश्न उपस्थित करण्यात आला होता.त्यावर आता या महाविद्यालयाचे अकॅडमिक ऑडिट(Academic Audit)करण्याचे आदेश देण्यात आले आहेत.परिणामी या महाविद्यालयांमध्ये असणाऱ्या शैक्षणिक सोई-सुविधांची माहिती समोर येणार आहे.

विद्यार्थ्यांना मराठी विषय घेण्यापासून रोखण्याचा आरोप कस्तूरी शिक्षण संस्थेच्या महाविद्यालयाविरोधात झाला होता.काही विद्यार्थ्यांनी लेखी तक्रार विद्यापीठाकडे केली होती.तसेच एका विद्यार्थ्यांचा व्हिडिओ सोशल मीडियावर व्हायरल झाला होता.विद्यापीठाने स्थापना केलेल्या समितीचा चौकशी अहवालही विद्यापीठाला सादर करण्यात आला होता.या अहवालावर विद्यापीठच्या बोर्ड ऑफ डीनच्या बैठकीत चर्चा करण्यात आली.संबंधित अहवाल स्वीकारण्यात आला.त्याचप्रमाणे या महाविद्यालयाचे अकॅडमिक ऑडिट करण्याच्या सूचना देण्यात आल्या आहेत,असे विश्वसनीय सूत्रांनी सांगितले.

दरम्यान, सर्व क्षेत्रातून रेटा वाढल्यानंतर आता संबंधित महाविद्यालयाने मराठी विषय बंद करणार नसल्याचे स्टॅम्प पेपरवर लिहून दिले आहे.मात्र, मराठीला अभिजात भाषेचा दर्जा प्राप्त झाल्यानंतर एखाद्या महाविद्यालयात एकही विद्यार्थी मराठी विषयाचे शिक्षण घेत नसेल तर ही खेदाची बाब आहे.तसेच संस्था व महाविद्यालयातील प्राध्यापक यांच्यातील वादामुळे विद्यार्थ्यांना मराठी विषय घेण्यापासून रोखले जात असेल तर विद्यार्थ्यांच्या होण्याऱ्या नुकसानीला जबाबदार कोण ? असा प्रश्न शिक्षण क्षेत्रातून उपस्थित केला जात आहे.