बसने शाळेत जाणाऱ्या विद्यार्थिनीचा मृत्यू;आपतकालीन दरवाजाने केला घात
शाळेत जाण्यासाठी निघालेल्या विद्यार्थिनीचा आपात्कालीन दरवाजा अचानक उघडल्याने बसमधून पडून दुर्दैवी मृत्यू झाला. जयश्री कन्नोर (वय १६) रा. कंक्राळे, असे मृत मुलीचे नाव आहे.
eduvarta@gmail.com 
एज्युवार्ता न्यूज नेटवर्क
पुण्यात खराडी भागात स्कूल बसला आग लागल्याची घटना ताजी असताना एस.टी. बसच्या आपात्कालीन दरवाज्यामुळे (ST bus emergency door) एक शाळकरी मुलीचा मृत्यू झाल्याची धक्कादायक घटना समोर आली आहे. मालेगाव तालुक्यातील कंक्राळे येथून करंजगव्हाण येथे शाळेत जाण्यासाठी निघालेल्या विद्यार्थिनीचा आपात्कालीन दरवाजा अचानक उघडल्याने बसमधून पडून दुर्दैवी मृत्यू (Student's death) झाला. जयश्री कन्नोर (वय १६) रा. कंक्राळे ता. मालेगाव असे मृत मुलीचे नाव आहे. या घटनेने परिसरात हळहळ व्यक्त केली जात आहे
जयश्री दैनंदिन वेळेप्रमाणे बसने शाळेत जात होती. बसमध्ये खुप गर्दी असल्याने ती मागील बाजूस असलेल्या आपत्कालीन दरवाजाजवळ उभी होती. गर्दीमुळे अचानक दरवाजा उघडल्याने दरवाजातून थेट बाहेर जमिनीवर पडल्याने गंभीर जखमी झाली. त्यानंतर तिला ग्रामस्थांनी त्वरित मालेगाव येथील खासगी रुग्णालयात दाखल केले. मात्र,डॉक्टरांनी तपासणीअंती जयश्रीला मृत घोषित केले. त्यानंतर या प्रकरणी मृत मुलीचे वडील केदा कन्नोर यांनी दिलेल्या फिर्यादीवरून वडनेर-खाकुर्डी पोलिसांनी बस चालक व वाहक यांच्याविरुद्ध जयश्रीच्या मृत्यूस कारणीभूत ठरल्याचा आरोप करत गुन्हा दाखल केला आहे.
तालुक्यातील कंक्राळे येथील जयश्री ही विद्यार्थिनी करजंगव्हाण गावातील न्यू इंग्लिश स्कूलमध्ये दहावीत शिकत होती. दररोजच्या प्रमाणे शाळेत जाण्यासाठी जयश्री व काही विद्यार्थी मालेगाव आगाराच्या बसने प्रवास करत होते. बसमध्ये मोठ्या प्रमाणात गर्दी होती यामुळे जयश्री बसच्या मागील बाजूस असलेल्या आपत्कालीन दरवाजाजवळ उभी राहिली. मात्र अवघ्या काही अंतरावर बस वेगात असताना आपत्कालीन दरवाजा अचानक उघडला. जयश्री दरवाजामधून पाठीमागे रस्त्यावर पडली. ही बाब निदर्शनास येताच बसमधील प्रवासी व विद्यार्थ्यांनी आरडाओरड करून बस थांबवली पण तोवर उशीर झाला होता.
