TAIT परीक्षेसाठी 2 लाख 36 हजार उमेदवारांचे अर्ज; परीक्षा केव्हा होणार?

एज्युवार्ता न्यूज नेटवर्क 

महाराष्ट्र राज्य परीक्षा परिषदेच्या (Maharashtra State Examination Council)माध्यमातून घेतल्या जाणाऱ्या 'शिक्षक अभियोग्यता व बुद्धिमत्ता चाचणी' अर्थात TAIT परीक्षेसाठी अर्ज करण्याची मदत संपुष्टात आली असून आतापर्यंत सुमारे 2 लाख 36 हजार उमेदवारांनी परीक्षेसाठी ऑनलाईन अर्ज केले आहेत. TAIT परीक्षा (TAIT exam) येत्या 24 मे ते 5 जून या कालावधीत घेण्याचे नियोजित आहे.मात्र, परीक्षा केंद्रातील भौतिक सुविधांची उपलब्धता आणि विद्यार्थ्यांची सोय विचारात घेऊन परीक्षेच्या तारखा निश्चित केल्या जाणार आहेत,असे विश्वसनीय सूत्रांनी सांगितले. 

 महाराष्ट्र राज्य परीक्षा परिषदेकडून  TAIT परीक्षेसाठी अर्ज करण्यासाठी 14 मे पर्यंत मुदत देण्यात आली होती. शासन आदेशानुसार डी.एड, बी. एड आणि एम. एड या अभ्यासक्रमाच्या शेवटच्या सत्रात असणारे किंवा शेवटच्या सत्रात अंतिम परीक्षेस प्रविष्ठ असणारे उमेदवार देखील शिक्षक अभियोग्यता व बुद्धीमत्ता चाचणी परीक्षेस पात्र (Student Eligibility) ठरविण्यात आले. त्यामुळे अनेक विद्यार्थ्यांना परीक्षा देण्याची संधी प्राप्त झाली आहे. 

राज्याच्या शिक्षण विभागातर्फे शिक्षक भरतीची प्रक्रिया राबवली जात आहे. त्यादृष्टीने TAIT परीक्षा आवश्यक आहे. या परीक्षेत गुणवत्तेसह उत्तीर्ण होणाऱ्या उमेदवारांना  शिक्षक भरतीत संधी मिळू शकते.त्याचप्रमाणे ज्या उमेदवारांच्या स्पर्धा परीक्षा किंवा इतर परीक्षा असल्यास संबंधित विद्यार्थ्यांकडून माहिती संकलित करण्यात आली आहे.विद्यार्थ्यांचे शैक्षणिक नुकसान होणार नाही, याची काळजी घेऊन विद्यार्थ्यांच्या परीक्षांचे नियोजन केले जाणार आहे, असेही विश्वसनीय सूत्रांनी सांगितले.