राष्ट्रीय होमिओपॅथी आयोगाच्या अध्यक्षांना सर्वोच्च न्यायालयाचा दणका; पदावरून हटवण्याचे आदेश !

एज्युवार्ता न्यूज नेटवर्क 

सर्वोच्च न्यायालयाने (Supreme Court) आज, बुधवारी (१२ फेब्रुवारी) राष्ट्रीय होमिओपॅथी आयोगाचे (National Homoeopathy Commission) अध्यक्ष डॉ.अनिल खुराणा यांना त्यांच्या पदावरून हटवण्याचे आदेश दिले आहे. (Chairman Dr. Anil Khurana has been ordered to be removed from his post) त्यांची नियुक्ती प्रक्रिया कायद्यानुसार नव्हती,असे न्यायालयाने म्हटले.

न्यायमूर्ती दीपांकर दत्ता आणि मनमोहन यांच्या सर्वोच्च न्यायालयाच्या खंडपीठाने कर्नाटक उच्च न्यायालयाचा आदेश रद्द करत  डॉ. खुराणा यांना एका आठवड्यात राजीनामा देण्याचे निर्देश दिले आहेत. डॉ. खुराणा यांच्या नियुक्तीला आव्हान देणाऱ्या डॉ. अमरगौडा एल. पाटील यांनी दाखल केलेल्या याचिकेवर हा आदेश देण्यात आला आहे. डॉ. पाटील  यांनी  त्यांच्या याचिकेत म्हटले होते की, "डॉ. खुराणा यांच्याकडे अध्यक्षपदासाठी  राष्ट्रीय होमिओपॅथी आयोग कायदा, २०२० च्या कलम ४(२) आणि १९ अंतर्गत आवश्यक अनुभव नाही.  जो या पदासाठी अनिवार्य होता."

न्यायालयाने म्हटले आहे की, "प्रतिवादीला तात्काळ पदावरून काढून टाकावे लागेल. 'तात्काळ' म्हणजे आजपासून एका आठवड्याच्या आत, जेणेकरून प्रतिवादी  वित्तविषयक कोणताही धोरणात्मक निर्णय न घेता त्याचे  कर्तव्य पार पाडू शकेल." खुराणा यांची नियुक्ती प्रक्रिया कायदेशीर औपचारिकता पूर्ण करत नव्हती, म्हणून ती रद्द करण्यात आली आणि नवीन अध्यक्षांच्या निवडीची प्रक्रिया तात्काळ सुरू करण्याचे आदेश देण्यात आले, असे सर्वोच्च न्यायालयाने म्हटले आहे.