पिझ्झा ऑर्डर केल्याने वसतिगृहातील विद्यार्थिनी अडचणीत

एज्युवार्ता न्यूज नेटवर्क 

नुकतच पुण्यात एक विचित्र प्रकार समोर आला आहे. एका मुलींच्या वसतिगृहात पिझ्झा ऑर्डर केल्यामुळे चार विद्यार्थिनींना वसतिगृहातून एका महिन्यासाठी निलंबित करण्यात आले असल्याची माहिती समोर आली होती. (students punished for one month for ordering pizza in hostel) ही माहिती प्रसार माध्यमांमध्ये प्रसारित झाल्यानंतर वसतिगृहाकडून याबाबतीत नवीन खुलासा देण्यात आला आहे. विद्यार्थिनींना फक्त कारवाईचा इशारा देत नोटिस बजावण्यात आली होती, असा दावा वसतिगृहाच्या प्रमुख मीनाक्षी नरहरे यांनी दिला आहे. 

मोशी येथील समाज कल्याण विभागाच्या मुलींच्या वस्तीगृहातील (Social Welfare Hostel) खोलीत पिझ्झाचा बॉक्स आढळून आला होता. ज्या खोलीत हा बॉक्स सापडला होता, त्या खोलीतील चारही मुलींनी नियमांचे उल्लंघन केले असल्याचे सांगत त्या विद्यार्थिनींना एक महिन्यासाठी वस्तीगृहातील प्रवेश रद्द करण्यात आल्याची नोटीस बजावण्यात आली होती. समाज कल्याण वसतिगृह सामाजिक न्याय विभागामार्फत चालवले जाते. मात्र आता याविषयी नरहरे यांनी आता नवा खुलासा केला आहे. 

नरहरे म्हणाल्या की, "बाहेरील खाद्यपदार्थ खाल्ल्यामुळे विद्यार्थ्यांना विषबाधा होऊ शकते तसेच जीबीएस या आजाराच्या पार्श्वभूमीवर विद्यार्थ्यांना समज म्हणून ही नोटीस देण्यात आली होती. मात्र प्रत्यक्षात त्यांच्यावर कोणतीही कारवाई करण्यात आली नाही. नोटीस देण्यात आलेल्या चारही विद्यार्थिनी ह्या वस्तीगृहातच राहत आहेत आणि त्यांचं दैनंदिन शिक्षण घेत आहेत." 

दरम्यान, हे प्रकरण उघडकीस आल्यापासून, हा चर्चेचा विषय बनला आहे. विद्यार्थिंनींच्या आरोग्याची काळजी घेणे ही चांगली बाब आहे. पण अशीच काळजी वसतिगृहातील इतर सोयी-सुविधांबाबतीतही घेतली जावी, अशी टीका केली जात आहे.